Úsh tilde bilim berýdiń tıimdiligi ǵylym arqyly dáleldengen - E. Saǵadıev

ASTANA. QazAqparat -Úsh tilde bilim berýdiń tıimdiligi ǵylym arqyly da dáleldengen. Ony engizýdiń balalarǵa esh qıyndyǵy joq. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstri Erlan Saǵadıev osylaı málim etti.

Mınıstrdiń paıymynsha, balalardyń úsh tilde sóılep, bilim alýynda eshqandaı da qıyndyq joq. «Eger jalpylama júrgizilgen zertteýlerge súıensek, eki jáne odan da kóp tilde sóıleıtin balalarda damý deńgeıi birshama joǵary. Buny ǵalymdar da mıkroskop arqyly dáleldegen: jeti jastaǵy eki tilde sóıleıtin balanyń mıyndaǵy sınopsııa baılanystary bir tilde ǵana sóıleıtin balaǵa qaraǵanda joǵary. Bul ǵylymmen dáleldengen. Osyǵan baılanysty, bala týǵannan bastap ekitildi ortaǵa tap bolsa, onyń mıynyń múmkindigi de joǵary bolady. Sondyqtan da, úsh tildi bilim berý júıesine kóshýdiń esh qıyndyǵy bolmaıdy dep sanaımyz», -dedi E. Saǵadıev.

Osyǵan baılanysty, mınıstr elimizde úsh tildi bilim berýge kóshýde esh kedergi bolmaýy kerek dep sanaıdy. «Biz 2019 jylǵa deıin joǵary synyptardy osy júıege kóshiretin bolamyz. Bir aıta ketetini, mektepte joǵary synyptarǵa tehnıkalyq mamandyqtar pánin aǵylshyn tilinde ótkize otyryp, oqýshynyń álemdik oqýdaǵy úderisterge yqpaldasýyna jaǵdaı jasaımyz. Bundaı yqpaldasý oqýshy úshin mindetti. Osylaısha, ol joǵary oqý oryndarynda da aǵylshyn tilinde oqytylatyn tehnıkalyq pánderge beıimdele bastaıdy», - dedi mınıstr E. Saǵadıev.