Úsh tehnologııalyq alpaýyt jasandy ıntellekt úshin biryńǵaı standart ázirlemek
ASTANA. KAZINFORM — AQSh-ta jasandy ıntellekt modelderin damytý qarqynyn báseńdetý máselesi talqylanyp jatqan tusta, Anthropic, Google jáne OpenAI sııaqty jetekshi tehnologııalyq kompanııalar jasandy ıntellekt salasynda standarttar ázirleıtin arnaıy organ qurý múmkindigin qarastyryp jatyr. Bul týraly Anadolu agenttigi jazdy.
AQSh-ta jasandy ıntellekt modelderin damytý qarqynyn báseńdetýge qatysty úndeýlerden keıin bul tehnologııany retteý jónindegi usynystardy talqylaý jalǵasyp jatyr.
CNN málimetinshe, aty-jónin atamaǵan derekkózder Anthropic, Google jáne OpenAI kompanııalary saladaǵy ortaq standarttardy aıqyndaıtyn jeke organ qurý múmkindigin talqylap jatqanyn habarlaǵan.
Derekkózderdiń aıtýynsha, kelissózderdiń bastalýyna Anthropic zertteýshisi Djeıkob Koksonnyń qyzmetinen ketýi emes, negizinen Google DeepMind kompanııasynyń negizin qalaýshylardyń biri Demıs Hassabıstiń shilde aıynda jarııalaǵan maqalasy túrtki bolǵan. Hassabıs óz maqalasynda AQSh basqaratyn jasandy ıntellekt standarttaryn ázirleıtin uıym qurýdy usynǵan.
Kelissózderge qatysy bar derekkózder talqylaýlardyń AQSh prezıdenti Donald Tramp ákimshiliginiń qatysýyna qaramastan jalǵasatynyn atap ótti. Sonymen qatar, tehnologııalyq sektor jetekshileri jasandy ıntellektini baqylaý máselesinde ázirge ortaq pikirge kele almaǵan.
Hassabıs óz maqalasynda memlekettik baqylaýda bolatyn jáne memlekettik ári jeke sektordyń yntymaqtastyǵyna negizdelgen uıym qurýdy usyndy. Onyń pikirinshe, mundaı mekeme jasandy ıntellekttiń ozyq modelderin qoldanysqa engizbes buryn arnaıy synaqtan ótkizýi tıis.
Jasandy ıntellekt salasynda jumys isteıtin amerıkalyq Anthropic kompanııasynyń bas dırektory Darıo Amodeı 12 qyrkúıekte kompanııanyń saıtynda maqala jarııalady. Bul onyń kompanııa zertteýshisi Djeıkob Kokson jasandy ıntellekt máselelerinde jaýapkershilik jetkiliksiz dep eseptep, qyzmetinen ketkennen keıin boldy.
Amodeı jasandy ıntellekt tehnologııasynyń geometrııalyq progressııamen damýy adamnyń bul júıelerdi túsiný jáne baqylaý múmkindiginen asyp ketýi yqtımal ekenin eskertti. Osyǵan baılanysty ol tehnologııanyń damý qarqynyn báseńdetip, ony baqylaý múmkindikterin keńeıtýdi usyndy.
Ilon Mask Amodeıdiń usynysyn qoldady. Anthropic basshysy jasandy ıntellektpen aınalysatyn kompanııalardy biriktirip, qaýipsizdik standarttaryn belgileý jáne II tehnologııalaryn naryqqa shyǵarý qarqynyn retteıtin naqty erejeler ázirleý qajet ekenin aıtqan bolatyn. Mask X áleýmettik jelisinde: «Darıo durys aıtady», – dep jazdy.
OpenAI bas dırektory Sem Altman da bul usynyspen kelisetinin aıtyp, táýelsiz baǵalaý máselesinde osyndaı qadamdarǵa baratynyn málimdedi.
Amodeı óz maqalasynda AQSh ákimshiligi Qytaıǵa mıkroshemalar eksporttaýǵa qoıylatyn shekteýlerdi kúsheıtip, qytaılyq jasandy ıntellekt zerthanalarynyń amerıkalyq kompanııalardyń modelderinen arnaıy «dıstıllıatsııa» ádisi arqyly derek alýyna jol bermeýi kerek ekenin atap ótti.
Eske sala keteıik, Eýropalyq Odaq soty Google-ǵa salynǵan 4,1 mlrd eýro aıyppuldy kúshinde qaldyrdy.
