Úsh teatrda qoıylǵan «Şelkýnchık» baleti 40 myńnan astam kórermen jınady
ASTANA. KAZINFORM — P. Chaıkovskııdiń «Şelkýnchık» baleti qysqy maýsymda Qazaqstannyń birden úsh teatrynda qoıylyp, jańa jylǵa arnalǵan klassıkalyq týyndy ekenin taǵy bir márte dáleldedi. Teatrlar jalpy 47 qoıylym usynyp, oǵan 40 myńnan astam kórermen kelgen.
Chaıkovskııdiń mýzykalyq murasy ár teatrda ártúrli qoıylǵan. Klassıkalyq oqıǵanyń jelisi barlyǵyna ortaq bolǵanymen, sahnada jetkizýi, plastıka men vızýal, ártisterdiń emotsııasy ózgeshe. Sondyqtan kórermenge ár teatr qoıylymy ártúrli áser etedi.
Máselen, «Astana Opera» teatrynda kórermenge ıÝrıı Grıgorovıch qoıǵan «Şelkýnchık» usynyldy. Spektakldiń kórkemdigin Sımon Vırsaladzeniń stsenografııasy men kostıýmderi aıshyqtaıdy: aýqymdy sahnalyq sheshimder men sándi kıimder naǵyz teatr ǵajaıyby men merekelik áser beredi.
Al «Astana Balet» teatry «Şelkýnchık» baletiniń Vasılıı Vaınonen redaktsııalap, Altynaı Asylmuratova sahnalaǵan nusqasyn qoıdy. Munda ár qımyldyń aıqyndyǵy, bıdiń jeńil ári yrǵaqty bolýy jas kórermenge erekshe jańa jyldyq kóńil-kúı syılaıdy.
Abaı atyndaǵy Qazaq ulttyq opera jáne balet teatrynyń sahnasynda «Şelkýnchık» maýsymdaǵy eń kóp kútetin spektaklderdiń biri bolyp sanalady. Balet uzaq jyldar boıy teatr repertýarynan túspeı keledi. Tarıhı balet Vaınonen nusqasynda qoıylǵan, al 2015 jyly spektakl jańartyldy. Sahnada klassıkalyq jáne zamanaýı teatr toǵysyp, erekshe kórkemdik úılesim tabady.
Jyl saıyn «Şelkýnchık» baleti klassıkalyq ónerdiń qundylyqtarymen tanystyryp, kórermen kóńilinen oryn taýyp keledi.
Aıta ketelik «Avatar» fılminiń úshinshi bólimi 1 mıllıard dollardan astam qarajat jınady.
