«Úsh shertý» ádisi - Qaznetti oısyratatyn úsh soqqy, dep sanaıdy qazaqstandyq saıttar
ALMATY. 6 maýsym. QazAqparat - Kiwi.kz, NUR.KZ, Yvision.kz jáne Namba.kz sııaqty qazaqstandyq iri saıttar Úkimet basshysy Kárim Másimovke, Baılanys jáne aqparat mınıstri Asqar Jumaǵalıevke Jáne Parlament depýtattaryna ashyq hat jazdy.
Internet-qoǵamdastyqtar hattarynda Qazaqstannyń Internet-Qoǵamdastyǵy usynyp otyrǵan «Úsh shertý» ádisine narazylyq bildirip otyr. Olar óz ustanymdaryn 8 maýsymda ótetin baspasóz máslıhatynda túsindirmek.
"Aıtylyp otyrǵan usynysty zańnamalyq negizdeý qaýipti", - deıdi olar. "Qazaqstannyń Internet-Qoǵamdastyǵy qurylǵan eki jyldan beri typ-tynysh otyrdy da, kenetten qyzý belsendilik tanytyp, Qaznettiń múddesine qarsy áreketterdi bastap otyr", - delingen hatta.
«Qazaqstandyq ınternettiń basty aıyrmashylyǵy sol, qazaqstandyq paıdalanýshylardyń kóbisi TMD elderiniń saıttaryna ketýde»,- dep túsindiredi hat avtorlary 6 maýsymda buqaralyq aqparat quraldaryna jasaǵan málimdemelerinde (http://yvision.kz/yv/165214 ).
Elimizdiń ulttyq operatory -«Qazaqtelekom» AQ 2008 jyldan bastap veb-jobalar men paıdalanýshylarǵa jaıly jaǵdaı jasap keledi. Bul kúsh-jigerlerdiń maqsaty - qazaqstandyq trafıktiń syrtqy resýrstarǵa aǵymyn azaıtý. Al usynylyp otyrǵan «Úsh shertý» ádisi - Qaznetti oısyratatyn ádis.
Birinshiden, paıdalanýshy zańsyz kontentti izdep, kz aýmaǵynan syrtqy resýrstarǵa ketedi. Ekinshiden, reseılik resýrstar qazaqstandyq saıttarǵa qaraǵanda negizgi basymdyqqa ıe bolady. Úshinshiden, otandyq torrentter men onlaın-kınozaldar domenderi men hostıngterin reseılik adresterge aýystyryp, Qazaqstan Respýblıkasynyń zańnamalyq aıasynan shyǵady.
Qalyptasqan jaǵdaıǵa taldaý júrgizgen ınternet-saıttardyń birlestigi, ınternettegi avtorlyq quqyqqa qatysty zańnamalyq aktilerdi ózgertýge eki jylǵa moratorıı engizýdi usynýda. Osy aralyqta TMD deńgeıinde avtorlyq quqyqty saqtaý máselesin sheshý kerek. Sondaı-aq, paıdalanýshylarmen, eń aldymen pırattyq kontentke ketip jatqan paıdalanýshylarmen túsindirý jumystaryn júrgizý kerek, deıdi hat avtorlary.
