Úsh ret joly bolmaǵan ońtústikkoreıalyq alǵashqy kommertsııalyq zymyran ǵaryshqa ushady

ASTANA. KAZINFORM — Ońtústik Koreıanyń ǵarysh salasyndaǵy startapy Innospace Co. eldegi alǵashqy kommertsııalyq orbıtalyq zymyrandy osy aptada ushyrýdy josparlap otyr. Ushyrylym buǵan deıin úsh ret keıinge qaldyrylǵan, dep habarlaıdy Yonhap.

Kompanııa ókilderiniń málimetinshe, Hanbit-Nano zymyrany Brazılııadaǵy Alkantara ǵarysh aılaǵynan dúısenbi kúni jergilikti ýaqyt boıynsha saǵat 15:45–te nemese Koreıa ýaqytymen seısenbi kúni tańǵy 3:45–te ushyrylýy tıis.

Hanbit-Nano zymyran-tasyǵyshy segiz kerekti júk jıyntyǵyn, onyń ishinde bes spýtnıkti alyp ushyp, olardy 300 shaqyrym bıiktiktegi Jer orbıtasyna shyǵarýdy kózdeıdi.

Ushyrylym sátti ótken jaǵdaıda Innospace tapsyrys berýshiniń spýtnıgin orbıtaǵa shyǵarǵan alǵashqy jekemenshik ońtústikkoreıalyq kompanııa atanbaq.

Kompanııa bastapqyda ushyrylymdy 22 qarashada ótkizýdi josparlaǵanymen, sodan beri start úsh ret keıinge shegerildi.

Alǵashqyda ushyrylym borttyq elektronıkadaǵy aqaýǵa baılanysty ótken sársenbige aýystyrylyp, keıin juma kúnine shegerilgen.

Juma kúni zymyrandy ushyrý áreketi janarmaı bagyndaǵy másele saldarynan taǵy da toqtatyldy, sodan keıin ushyrý operatory startty keıinge qaldyrý týraly sheshim qabyldady.

Innospace kompanııasy seısenbi kúni boljanyp otyrǵan jańbyrǵa baılanysty aýa raıy jaǵdaılary ushyrylymǵa áser etýi múmkin ekenin habarlady.

«Ushyrylymnyń naqty ýaqyty aýa raıy jaǵdaıyna baılanysty ózgerýi múmkin», dedi kompanııa ókili. «Jańbyr toqtaǵan kezde ǵana ushyrylym júzege asady».

Eske sala ketsek, Blue Origin kompanııasy arbada otyrǵan adamdy ǵaryshqa ushyrdy.

Al HǴS ǵaryshkeri stansada «tún» qansha ýaqytqa sozylatynyn aıtty.