Úsh óńirdegi jylý elektr ortalyqtarynyń qurylysy qashan bastalady
ASTANA. KAZINFORM – Kókshetaý, Semeı jáne Óskemen qalasynda jańa jylý elektr ortalyqtary salynady. Qurylys týraly «Samuryq-Energo» AQ basqarma tóraǵasy Qaırat Maqsutov aıtyp berdi.
- Úsh jylý elektr ortalyǵynyń (JEO) qurylysyna qatysty úkimetaralyq kelisimderge qol qoıylǵany belgili, qazir jumys jobalaý kezeńinde, ıaǵnı jobalaý-smetalyq qujattama ázirlenip jatyr. Jobalaý kezeńi aıaqtalmaıynsha jáne saraptamadan ótpeıinshe, biz ázirge jobanyń quny týraly aıta almaımyz, - dedi Qaırat Maqsutov «Samuryq-Qazyna» ulttyq kompanııasynda ótken is-shara barysynda.
Osy oraıda BAQ ókilderi «Samuryq-Energo» basshysynan jańa jylý elektr ortalyqtarynyń qurylysyna qatysty naqtylaýyn saýalyn qoıdy.
- Kókshetaý JEO boıynsha daıyndyq jumystaryn bastadyq, jaz boıy daıyndyq jumystaryn jalǵastyramyz. Qurylys belsendi túrde jyl sońynda bastalyp, 2026 jyly aıaqtalady. Sondaı-aq, bıyl jabdyqqa tapsyrys beriledi, - deıdi ol.
Eske salsaq, byltyr sáýirde Qazaqstan Respýblıkasy men Reseı Federatsııasynyń energetıka mınıstrlikteri arasynda Kókshetaý, Semeı jáne Óskemen qalalarynda JEO salý jobalary boıynsha yntymaqtastyq týraly kelisimge qol qoıyldy.
Keıin elimizdiń úsh qalasynda salynatyn jylý elektr ortalyqtary «Samuryq-Energo» kompanııasynyń teńgeriminde bolatyny belgili boldy.
Energetıka mınıstrliginiń aqparaty boıynsha Kókshetaýdaǵy jylý ortalyǵy 2029 jyly, Óskemendegi ortalyq 2031 jyly, al Semeıdegi ortalyq 2032 jyly tolyq paıdalanýǵa beriledi.
Aıta keteıik, búgin «Samuryq-Qazyna» ulttyq kompanııasynyń qoǵamdyq keńesiniń otyrysy ótti. Ol jerde «Samuryq-Energo» kompanııasynyń ótken jylǵy jumys esebi men bıylǵy jospary talqylandy.