Úsh óńirde ońaltýdyń tehnıkalyq quraldaryn paıdalanýdyń jańa modeli iske qosylady
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen ótken Úılestirý keńesiniń otyrysynda ońaltýdyń tehnıkalyq quraldaryn (OTQ) óteýsiz paıdalaný jáne qaıtarýdyń jańa modelin engizýge baǵyttalǵan pılottyq jobany iske asyrý merzimi bekitildi.
2026 jylǵy 1 shildeden bastap Aqtóbe, Qaraǵandy jáne Pavlodar oblystarynda OTQ paıdalanýdyń búkil kezeńinde azamattardy úzdiksiz qoldaýdy kózdeıtin jańa júıe tájirıbelik rejımde iske qosylady.
Mınıstrlik bul pılottyq joba múgedektigi bar adamdardyń Áleýmettik qyzmetter portaly arqyly paıdalaný merzimi aıaqtalǵannan keıin jańa OTQ alý quqyǵyna eshqandaı ózgeris engizbeıtinin erekshe atap ótedi. Máselen, kreslo-arbalar burynǵydaı ár bes jyl saıyn jańasyna aýystyrylady. Jańa model qoldanystaǵy memlekettik kepildikterdi almastyrmaı, olardy tolyqtyratyn qosymsha óteýsiz servıstik qyzmet retinde engiziledi.
Jańa júıe iske qosylǵannan keıin azamattar OTQ isten shyqqan jaǵdaıda nemese qural boıynsha tehnıkalyq másele týyndasa, Áleýmettik qorǵaý salasyn damytýdyń ulttyq ǵylymı ortalyǵynyń fılıalyna júgine alady. Munda tehnık-mamandar men reabılıtologtar tehnıkalyq saraptama júrgizip, jóndeý jumystaryn uıymdastyrady. Jóndeý kezeńinde azamattyń ońaltý protsesi úzilmeýi úshin aıyrbastaý qorynan ýaqytsha jaramdy qural beriledi. Eger quraldy qalpyna keltirý múmkin bolmasa, ol esepten shyǵarylyp, múgedektigi bar jan jańa OTQ berilgenge deıin ýaqytsha quralmen qamtamasyz etiledi.
— Jańa servıstik modelde balalarǵa erekshe kóńil bólingen. Buǵan deıin bala óskenniń ózinde tehnıkalyq quraldy belgilengen merzim aıaqtalǵanǵa deıin aýystyrýǵa múmkindik bolmaǵan. Al pılottyq joba aıasynda bul másele sheshimin tappaq. Eger OTQ balanyń boıyna nemese antropometrııalyq erekshelikterine sáıkes kelmese, bes jyldyq paıdalaný merzimin kútpeı-aq oǵan laıyqty jańa qural beriledi, — delingen mınıstrlik habarlamasynda.
Ulttyq ǵylymı ortalyq mamandarynyń aıtýynsha, OTQ-nyń búkil qyzmet etý tsıkli tolyq tsıfrlandyrylady. Aqparattyq júıe paıdalaný merzimi aıaqtalýǵa úsh aı qalǵanda paıdalanýshyǵa avtomatty túrde SMS-habarlama joldaıdy. Belgilengen merzim aıaqtalǵan soń azamat quraldy qaıtarady. Dıagnostıka men jóndeýden keıin ol ári qaraı paıdalanýǵa jaramdy dep tanylsa, mindetti sanıtarııalyq óńdeýden ótkizilip, ýaqytsha paıdalanýǵa arnalǵan prokat pýnktteriniń aıyrbastaý qoryna jiberiledi. Bul basqa azamattardy OTQ-men ýaqytsha qamtamasyz etýge múmkindik beredi.
2026 jylǵy 1 shildeden bastalatyn pılottyq jobanyń alǵashqy kezeńinde servıstik model kreslo-arbalardyń barlyq túri men júrip-turýǵa arnalǵan qurylǵylardy qamtıdy. Bul baǵyt boıynsha qajetti ınfraqurylym daıyndalyp, tehnık-mamandar arnaıy oqytýdan ótti.
Mınıstrlik pılottyq jobaǵa qatysý tolyqtaı erikti negizde júzege asyrylatynyn atap ótedi. Jobanyń negizgi maqsaty — jóndeý men servıstik qyzmet kórsetý tetikterin, sondaı-aq tsıfrlyq sheshimderdiń tıimdiligin úsh óńirde tájirıbeden ótkizip, keıin ony respýblıka kóleminde kezeń-kezeńimen engizý múmkindigin pysyqtaý.
Aıta ketelik múgedektigi bar azamattardyń quqyǵyn qorǵaý baǵytynda 485 tekserý júrgizilgen edi.
