Qazaqstandyq balýandar sambodan álem chempıonatynyń 2-shi kúni 1 altyn, 2 kúmis medal jeńip aldy

ASTANA. KAZINFORM - Búgin Astana qalasynda sambodan álem chempıonatynyń 2-kúni Qazaqstan quramasynyń 3 sportshysy fınalda kúsh synasty, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.

Sporttyq sambodan 64 kg deıingi salmaqta Esentaı Imahanov asa tartysty aıqasta ózbekstandyq Sardor Olımjonovtan jeńisti julyp alyp, altynnan alqa taqty.

Al sporttyq sambodan aqtyq synda Gúldana Álmuhanbetova (54 kg) Anastasııa Lýkanınadan (FIAS-1), al Elaman Qoıshybaev (88 kg) Sergeı Rıabovtan utylyp, kúmis júldege ıe boldy.

Sondaı-aq jaýyngerlik sambodan Arnur Qýataı (71 kg) men Ulbosyn Ádilova (80 kg), sporttyq sambodan Shynar Abatova (72 kg), para sambodan Asqar Kaırov qola júldeger atandy.

Búgin júldegerlerdi marapattaýǵa QR Týrızm jáne sport mınıstri Erbol Myrzabosynov qatysty.

Eske sala keteıik, keshe, álem chempıonatynyń alǵashqy kúni Ulttyq qurama 1 altyn, 4 qola medal jeńip alǵan. Qazir enshimizde 2 altyn, 2 kúmis, 8 qola medal boldy. Erteń sheshýshi jarys kúni ótedi.

Bıylǵy ÁCh-na 80 memleketten 470 sportshy jınaldy. Al elimizdiń namysyn 28 otandasymyz qorǵap jatyr. Osy chempıonattyń ereksheligi - áıelder arasynda jaýyngerlik sambo men zaǵıptardyń saıysy birinshi márte engizilýi.

ÁCh-nyń jalpy júlde qory 311 myń AQSh dollary (1-oryn - 4 000 dollar, 2-oryn - 3 000 dollar, 3-oryn - 2 000 dollar jáne zaǵıptar arasyndaǵy chempıon - 1 000 dollar).

Osyǵan deıin Astanada 2005 jyly qarashada sporttyq sambodan álem chempıonaty ótip, Ulttyq qurama 1 altyn, 3 kúmis, 6 qola medal jeńip alǵan.

Osyǵan deıin Astanada sambodan álem chempıonaty bastalǵanyn jazǵan edik.