Úsh óńirde ınvestıtsııa kólemi tómendep ketken
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Nurlan Baıbazarov Úkimet otyrysynda 2024 jyldyń alǵashqy eki aıyndaǵy ekonomıkalyq-áleýmettik kórsetkishterdi baıandady.
«Qańtar-aqpan aılarynyń qorytyndysy boıynsha Qazaqstan ekonomıkasynyń ósýi 4,2% bolyp, qańtardaǵy 3,9%-ke qaraǵanda jedeldedi. Naqty sektorda oń dınamıka baıqalýda. Naqty sektor – 5,1%-ke, al qyzmet kórsetý salasy – 3,5%-ke ósti. Salalar arasynda eń joǵary ósýdi qurylys, aqparat jáne baılanys, kólik jáne qoımalaý, sondaı-aq óńdeý ónerkásibi kórsetti. Negizgi kapıtalǵa salynǵan ınvestıtsııalardyń ósýi 7,9% bolyp, qańtardaǵy 0,6%-ke qaraǵanda aıtarlyqtaı jedeldedi. Investıtsııalar kólemi qurylysta – 2,7 ese, bilim berýde – 56%, kólik jáne qoımalaýda – 47%, aqparat jáne baılanysta – 45%, óńdeý ónerkásibinde – 37%, aýyl sharýashylyǵynda – 12% ósti», - dedi Nurlan Baıbazarov.
Mınıstrdiń sózinshe, óńirler arasynda eń joǵary ósý Qyzylorda, Túrkistan, Jetisý oblystarynda, Astana qalasynda baıqalǵan.
«Bul rette, Aqmola, Atyraý jáne Mańǵystaý oblystarynda ınvestıtsııa kóleminiń tómendeýi baıqalady. Aldyn ala qorytyndy boıynsha qańtarda syrtqy saýda taýar aınalymy 10 mlrd dollardan asty. Eksport 6 mlrd dollarǵa jýyqtady, onyń ishinde óńdelgen taýarlar eksporty – 1,6 mlrd dollar. Taýarlar ımporty 4 mlrd dollardan asty. Jalpy, oń saýda balansy 1,7 mlrd dollardy qurady. Óńdeý ónerkásibi ósý qarqynynyń jedeldeýin kórsetýde. Óndiris kólemi 7,4%-ke ósti. Kórsetkishtiń ósýi 16 óńirde tirkeldi. Sonyń ishinde eń joǵary ósýdi Qyzylorda, Aqtóbe, Shyǵys Qazaqstan jáne Batys Qazaqstan oblystary kórsetti», - dedi vıtse-premer.
