Úsh óńirde azyq-túlik taǵamdary jaramdylyq merziminiń saqtalmaýyna narazylar kóp
Elimizdiń úsh óńirinde azyq-túlik taǵamdary jaramdylyq merziminiń saqtalmaýyna narazylar kóp. Bul týraly Saýda jáne ıntegratsııa mınıstri Arman Shaqqalıev aıtty, dep habarlaıdy Kazinform.
«Mınıstrlik tutynýshylyq kóńil-kúıdi únemi qadaǵalap otyrady. Aıtalyq, ótken jyldyń qorytyndysynda 10 myń respondentten alynǵan áleýmettik saýalynama nátıjesi boıynsha jaǵdaı mynadaı: 31 paıyzy azyq-túlik taǵamdarynyń jaramdylyq merziminiń jáne saqtaý normasynyń saqtalmaýyna tap bolǵan. Eń kóp narazylyq Almaty qalasynda jáne Atyraý men Shyǵys Qazaqstan oblysynda baıqalady. Saýalnamaǵa qatysqandardyń 24 paıyzy taýar sapasyna rıza emes. Olar Aqtóbe, Qaraǵandy oblystarynda, sonymen qatar elordamyzda kóp. 19,2 paıyzy zańmen talap etiletin azyq-túlik taǵamdary týraly aqparattyń joqtyǵyna shaǵymdandy. Bul jaıynda Shyǵys Qazaqstan, Batys Qazaqstan, Jambyl jáne Túrkistan oblystarynda turatyn respondentter habarlady», - dedi mınıstr BAQ ókilderine arnalǵan baspasóz máslıhatynda.
Onyń atap ótýinshe, tutynýshylar quqyqtaryn qorǵaý tıimdiligin arttyrý tek memlekettik organdarǵa ǵana emes, sonymen qatar úkimettik emes ınstıtýttarǵa da baılanysty.
«Birlesken jumystyń nátıjesinde ımporttalatyn ónimniń 68 túrine zertteý jasaldy. Olardyń 19 túri boıynsha tamaq ónimderiniń qaýipsizdigi týraly normatıvterdiń buzylýy anyqtaldy. Atap aıtqanda, sóz ónimniń sanıtarııalyq-epıdemıologııalyq talaptarǵa, málimdelgen sıpattamasy men quramyna, sonymen qatar tańbalaý talaptaryna saı kelmeýi sııaqty buzýshylyqtar jaıynda bolyp otyr. Qorytyndysynda mınıstrlik tamaq ónimderiniń sáıkestigi týraly 63 deklaratsııanyń sáıkestigin baǵalaý týraly 200-den astam qujatty joıdy», - dedi Arman Shaqqalıev.
