Úsh óńirdegi órt: Depýtattar turǵyn úılerdi tekserýdi surady
NUR-SULTAN. QazAqparat – Májilistiń jalpy otyrysynda depýtattar ótken aptada adam ólimine ákep soqqan Jambyl, Qyzylorda oblystarynda jáne Petropavl qalasynda bolǵan qaıǵyly oqıǵalarǵa baılanysty Úkimet basshysynyń atyna depýtattyq saýal joldady, dep habarlaıdy QazAqparat tilshisi.
«Tas túsken jerine aýyr» - demekshi bul jaǵdaı búkil Qazaqstandyqtardyń qaıǵysy. Órt saldarynan jazyqsyz nárestelerinen jáne azamattarynan aıyrylyp qalǵan jaqyndaryna depýtattar atynan qaıǵyryp kóńil aıtamyz. Kinásiz dúnıeden ótken balalarymyzdyń, azamattarymyzdyń qaýipsizdigi úshin kim jaýapty degen suraq barshamyzdy oılandyrady. Osy oqıǵa tıisti jergilikti atqarýshy organdarǵa úlken sabaq bolý qajet. Qashanǵy bizdiń turǵyndarymyz ottyń astynda qala berý kerek? Erteńgi kúni bundaı jaǵdaılarǵa tap bolmaýymyzǵa kim kepil?», - dedi depýtat Fahrıddın Qarataev.
Onyń aıtýynsha, bolǵan oqıǵalar boıynsha túbegeıli sheshimdi talap etetin máseleler kóp ekenin kórsetti.
«Ótken jyldyń qyrkúıeginde tıisti ókilettiktermen jáne kadrlarmen qamtamasyz etilgen Tótenshe jaǵdaılar mınıstrligi qaıta quryldy. Alaıda, onyń atqarǵan jumysy árdaıym ýaqytyly jáne tıimdi bola bermeıdi.
2020 jyldyń 9 aıynda elimizde toǵyz myńnan astam órt boldy, 228 adam qaza tapty, jaraqat alǵandar - 217 adam. Tótenshe jaǵdaılar mınıstrligi qys maýsymyna daıyndyq jumystary júrip jatqandyǵy týraly málimdedi. Olardyń málimetteri boıynsha, jumystardyń barlyǵy aıaqtalyp, kemshilikterdi joıý týraly nusqaýlar berilgen. Alaıda, oryn alyp otyrǵan qaıǵyly oqıǵalar istelip jatqan profılaktıkalyq jumystyń jetkiliksiz ekendigin kórsetti», - dedi depýtat.
Osy oraıda ol Prmeer-Mınıstr Asqar Mamınnen Tótenshe jaǵdaılar mınıstrligi óńirlerdiń ákimdikterimen birlesip, kópqabatty úılerge, ásirese ýaqytsha baspana men saıajaılarǵa, basqa da jaıly emes turǵyn úılerge árbir naqty jaǵdaıda kómek kórsetý turǵysynan tolyq jumystardy júrgizýdi surady.
«Jańatas, Qyzylorda jáne Petropavldaǵy oqıǵalaryǵa qatysty júrgizilgen tergeý nátıjeleri boıynsha kináli laýazymdy tulǵalarǵa eń qatań sharalar qabyldap jáne bul týraly buqaralyq aqparat quraldaryna málimet berýdi usynamyz. Osyndaı jaǵdaılardyń aldyn alý jónindegi ahýal erekshe baqylaýǵa alynyp, Tótenshe jaǵdaılar mınıstrligi jergilikti ákimdiktermen birlesip, profılaktıkalyq jumystardy órt qaýipsizdigin baqylaý jáne aldyn alý sharalardy kúsheıtý jónindegi júıeli jumystardy júrgizýdi usynamyz», - dedi Fahrıddın Qarataev.
