Úsh óńirde ákimder saılaýy 28 tamyzda qaıta ótetin boldy - OSK

ASTANA. 10 tamyz. QazAqparat - Úsh óńirde ákimder saılaýy 28 tamyzda qaıta ótetin boldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde aýyl ákimderiniń saılaýyna qatysty ótken brıfıngte QR Ortalyq saılaý komıssııasynyń múshesi Baqyt Meldeshov málim etti.

OSK múshesiniń aıtýynsha, tańdaýshylardyń daýysy teń túskendikten elimizdiń úsh okrýginde aýyl ákimderiniń saılaýy qaıta ótetin boldy. Bul 28 tamyzǵa taǵaıyndalǵan. 8 tamyzdan bastap aýdan ákimderi osy úsh okrýgke kandıdattardy usyna alady.

«Atap aıtqanda Pavlodar oblysynda eki aýyldyq okrýg pen Mańǵystaý oblysy Mańǵystaý aýdanynyń Tuşyqudyq aýyldyq okrýginde saılaý qaıta ótedi. Jalpy bul saılaýǵa buǵan deıingi saılaýǵa úmitker retinde qatysqan kandıdattar da qatysa alady. Biraq, ondaı úderister negizinen aýdan ákimderine qatysty. Óıtkeni, aýdan ákimderi saılaýǵa dál sol kandıdattardy balama retinde aýmaqtyq saılaý komıssııalaryna usynǵan bolsa, onda olar taǵy da úderiske qatysa alady», - dedi B. Meldeshov.