Úsh oblystyń turǵyndaryna medıtsınalyq poıyzdar qyzmet kórsetedi

NUR-SULTAN. QazAqparat – Jyldyń sońyna deıin Aqmola, Soltústik Qazaqstan jáne Túrkistan oblystarynyń turǵyndaryna medıtsınalyq poıyzdar qyzmet kórsetedi. Bul týraly QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Shalǵaı aýyldardyń halqyna medıtsınalyq kómektiń qoljetimdiligin jaqsartý úshin jyljymaly kólik medıtsınasy uıymdastyryldy. Respýblıkada dıagnostıkalyq qyzmetter men mamandardyń keń beıinimen qamtylǵan 149 jyljymaly medıtsına kesheni jumys isteıdi. Ótken jylmen salystyrǵanda jyljymaly medıtsınalyq kómek qyzmetteri eki ese artty. Osy jyldyń 8 aıynda kóshpeli medıtsına 2 200-den astam eldi mekendi aralady, 1,1 mln astam aýyl halqy qamtyldy», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, osy jyldyń 23 mamyrynan beri «Járdem» poıyzy, al 20 maýsymnan bastap «Salamatty Qazaqstan» poıyzy jolǵa shyqty.

Olar 147 stansa men aýyl halqyna medıtsınalyq qyzmet kórsetti.

Qazirgi ýaqytta Atyraý, Aqtóbe, Almaty, Abaı, Jetisý, Batys Qazaqstan, Shyǵys Qazaqstan, Qyzylorda, Pavlodar, Mańǵystaý oblystaryndaǵy 80-nen astam stansa, 38 myńnan astam aýyl halqyna, onyń ishinde 9 myń balaǵa medıtsınalyq poıyzdar birqatar medıtsınalyq qyzmet kórsetip úlgerdi.

«Osy jyldyń sońyna deıin Aqmola, Soltústik Qazaqstan jáne Túrkistan oblystarynyń turǵyndary medıtsınalyq poıyzdarmen qamtylady», - dedi Ajar Ǵınııat.

Foto: ortcom.kz