Úsh oblystyq perınataldyq ortalyq «Tynys al, balaqaı» jobasy aıasynda zamanaýı medıtsınalyq jabdyqtarmen qamtamasyz etildi

Bul týraly búgin Almatyda ótken arnaıy baspasóz máslıhatynda «AıALA» qaıyrymdylyq qorynyń vıtse-prezıdenti Jangeldi Sársenov málim etti.

"Úsh ortalyqqa ınvazıvtik emes SIPAP (CPAP) jabdyqtary, Reanımatsııa ústeli ınfýzıondyq jáne shprıtstik mólsherleýish, reanımatsııa qobdıshasy, patsıent monıtory jáne de basqa medıtsınalyq qurylǵylar tabystaldy. Jabdyqtardyń kópshiligi shala týylǵan nárestelerdi baqylaýǵa arnalǵan. Endi, Óskemen, Semeı, Qaraǵandy qalalarynyń oblystyq perınataldyq ortalyqtary der kezinde emdik sharalaryn júrgize alatyn bolady",-dedi J. Sársenov.

Onyń aıtýynsha, «Tynys al, balaqaı» jobasynyń arqasynda Almaty qalalyq perınataldyq ortalyǵynda salmaǵy 1 kg-nan aspaıtyn nárestelerdiń ómirge qalyptasý kórsetkishi 5% dan 24% deıin joǵarylaǵan.

Esterińizge sala ketsek, «Tynys al, balaqaı» jobasy 2009 jyldan bastap iske asýda. Joba perzenthanalar men perınataldyq ortalyqtardyń balalar reanımatsııa bólimshelerin, óte tómen salmaqta shala týylǵan nárestelerdi qadaǵalaýǵa arnalǵan medıtsınalyq jabdyqtarmen qamtamasyz etýge baǵyttalǵan.

Atalmysh qordyń málimetinshe, búginde náresteler shetineýiniń eń joǵarǵy kórsetkishi, 500 jáne 999 gramm aralyǵynda týylǵan náresteler arasynda baıqalýda. Qaraǵandy oblystyq perınataldyq ortalyǵynda, jyl saıyn 4000 sábı dúnıege keledi eken. Sonyń ishinde 15%-y shala týylǵan náresteler. 2010 jyl boıynsha, salmaǵy 1000 grammǵa deıin týǵan 46 baladan 35-i, al 2009 jyl boıynsha 32 baladan 26-sy shetinegen. 2009 jyly, Qaraǵandy oblysy boıynsha jańa týǵan nárestelerdiń shetineýi 19,3% quraǵan. Sonyń ishindegi eń úlken úles salmaǵy shala týǵan nárestelerdiń shetineýimen tikeleı baılanysty bolýda.

Al, Semeı qalasynyń oblystyq perınataldyq ortalyǵynda 2011 jyldyń birinshe toqsanynda týylǵan bala sany-761 bolǵan, onyń 10%-yn shala týylǵan náresteler qurap otyr. Birinshi toqsanda shetinegen 11 sábıdiń 9-y shala týylǵan.

2010 jyly Óskemen qalasynda ornalasqan Shyǵys Qazaqstan boıynsha qyzmet atqaratyn perınataldyq ortalyǵynda 7441 sábı dúnıe esigin ashqan. Solardyń ishinde 484-i náreste shala týylǵan. 222 sábıdiń tynys alý júıelerinde aýytqýlar baıqalǵan, solardyń ishinde 26 shala týylǵan náreste shetinep ketken.

"Qazaqstannyń barlyq perınataldyq ortalyqtarynda sábılerdiń shetineýiniń basty sebebi, tynys alý júıesiniń buzylýynda bolyp otyr. Bul oraıda, SIPAP jabdyqtary bul máseleniń aldyn alýǵa bolatyn birden-bir jabdyq ekenin atap ótkim keledi",-dedi Jangeldi Sársenov.

Baspasóz máslıhaty barysynda «AıALA» qaıyrymdylyq qory jobaǵa kómek qolyn sozyp, demeýshilik kórsetken «Kar-Tel» kompanııasyna, «Qaǵanat» ashanalar jelisine, sheteldik isker Arvınd Tıkýǵa jáne «Dialin» ınterer úıine úlken alǵysyn bildirdi.