Úsh oblysta jáne Astanada aýa raıyna baılanysty eskertý jarııalandy
ASTANA. QazAqparat – Soltústik Qazaqstan men Aqmola oblysynda aýa raıyna baılanysty eskertý jarııalandy, dep habarlaıdy QazAqparat «Qazgıdromet» RMK-ǵa silteme jasap.
15 naýryzda Soltústik Qazaqstan oblysynda batys, ońtústik-batys baǵyttan jyldamdyǵy 15-20 m/s, ekpini 23-28 m/s, keı jerlerde 30 m/s-ke deıin jetetin kúshti jel soǵady. Kóktaıǵaq pen burqasyn bolýy yqtımal.
Petropavl qalasynda 14 naýryz kúni ońtústik-batystan soqqan jel kúshi 15-20 s/m bolady dep kútilýde. 15 naýryzda batystan, soltústik-batystan jyldamdyǵy 15-20, keı jerlerde 23-28 m/s jel soǵady, kúndiz keı ýaqyttarda 30 m/s jáne odan asady. Keı jerlerde kóktaıǵaq, burqasyn bolady.
14-15 naýryzda Aqmola oblysynda batys, ońtústik-batystan soǵatyn jeldiń kúshi 15-20 m/s, keı jerlerde 23-28 m/s, tipti 30 m/s-ke jetýi múmkin. Keı jerlerde kóktaıǵaq pen burqasyn bolýy yqtımal.
Astana qalasynda 15 naýryz tańerteń jáne kúndiz ońtústik, ońtústik-batystan jel soǵyp, onyń ekpini 15-20 m/s-ke jetýi múmkin.
Daýyldyń yqtımaldyǵy - 85-90%.
14 naýryzda Batys Qazaqstan oblysynyń keı jerlerinde tuman, kóktaıǵaq, kúndiz soltústikten soǵatyn jeldiń kúshi 17-22 m/s jetedi. Oral qalasynda 14 naýryz kúni tuman, kóktaıǵaq bolady. Kúndiz soltústikten soǵatyn jeldiń kúshi 18 m/s bolady.
