Úsh oblysta taýyq jumyrtqasy 10-12% joǵary baǵamen satylǵan

ASTANA. QazAqparat - QR Premer-Mınıstrdiń orynbasary – saýda jáne ıntegratsııa mınıstri Serik Jumanǵarınniń tóraǵalyǵymen ótken keńeste negizgi azyq-túlik ónimderin satý kezinde júretin deldaldyq shemalardy tekserý jónindegi óńirlik komıssııalardyń ótken aptadaǵy jumysynyń nátıjeleri qaraldy, dep habarlaıdy primeminister.kz.

Elektrondyq shot-faktýralardy taldaý qorytyndysy boıynsha Saýda komıteti Aqmola, Batys Qazaqstan jáne Ulytaý oblystarynda taýyq jumyrtqasyna belgilengen ústemeden artyq qosyp satylǵan jaǵdaılardy anyqtady.

Aıta keteıik, taýyq jumyrtqasyna zańnamada belgilengen ústeme – 15%. Atap aıtqanda, «Kýrochka rıaba» JShS kóterme satýshysy qazan-qarasha aılarynda eki qus fabrıkasynan 25 mln danadan astam birinshi sanatttaǵy jumyrtqa satyp alǵan, onyń 6 mln-y 25-ten 27%-ǵa deıingi saýda ústemesimen satylǵan bolyp shyqty. Óńirlerde anyqtalǵan faktiler boıynsha barlyq materıal tıisti sharalar qabyldaý úshin ákimdikterge berildi.

«Biz bıznesten múmkin emes nárseni talap etpeımiz, paıda tappaı jumys isteýge bolmaıtynyn túsinemiz. Alaıda zańnama aıasynda jumys isteý kerek, áleýmettik mańyzy bar azyq-túlik taýarlaryna belgilengen saýda ústemesin asyrmaý kerek. Ákimdikterdiń nazaryn taǵy da saýda ústemesin normadan asyrý tájirıbesin toqtatý qajettigine aýdaramyn», — dedi Serik Jumanǵarın.

Keńeste «aınalym shemasy» aıasynda qant zaýyttaryn qarjylandyrý boıynsha jańa tásilderdi iske asyrý protsesi talqylandy. Búgingi tańda 10,8 mlrd teńgege (ótken aptada 7,664 mlrd) qaryz sharttaryn 10 óńir (ótken aptadan bastap úsh) jasasty. Almaty, Astana, Shymkent qalalary, Jetisý, Mańǵystaý, Aqtóbe, Almaty, Túrkistan, Ulytaý oblystary kelesi aptanyń sońyna deıin osyndaı sharttarǵa qol qoıýǵa daıyn ekenderin rastady.

Aýyl sharýashylyǵy vıtse-mınıstri Jeńis Óserbaı fermerlerdi, áleýmettik mańyzy bar azyq-túlik taýarlaryn óndirýshilerdi qarjylandyrý jáne qaıta óńdeý kásiporyndaryna aınalym qarajatyn bólý jónindegi jumystardyń barysy týraly habardar etti.

«Fermerlerdi kóktemgi egis jumystaryna forvardtyq qarjylandyrý keıinnen turaqtandyrý qorlaryna kókónisterdi jetkizý úshin bir jyl buryn júzege asyrylatyn bolady. 2023 jyly erte jınalatyn ónimdi satyp alýǵa qarajat 10 qańtarǵa jáne 1 aqpanǵa deıin bólinedi. Odan keıingi jyldary qarajat bólý erte egin jınaý úshin 1 tamyzǵa deıin jáne kúzgi egin jınaý naýqany úshin 1 qyrkúıekke deıin qarastylmaq. Bul mehanızm qazirdiń ózinde bekitilgen», — dedi Jeńis Óserbaı.