Úsh oblysta ótken jıyndarda orystildi azamattar memlekettik tildi belsendi ıgerý turǵysynda kóptegen usynystar aıtty - D. Kóshim

ASTANA. QazAqparat - Úsh oblysta ótken jıyndar barysynda orystildi azamattar memlekettik tildi qoldaný aıasyn keńeıtý turǵysynda kóptegen usynystar aıtty. Bul týraly búgin «Qazaqstannyń bolashaǵy - qazaq tilinde» orystildi azamattar arasynda memlekettik tildi nasıhattaý jobasy boıynsha qorytyndy brıfıngte QHA ǵylymı-sarapshylyq keńesiniń múshesi, qoǵam qaıratkeri Dos Kóshim málim etti.

Aıta keteıik, QR Mádenıet jáne sport mınıstrligi Tilderdi damytý jáne qoǵamdyq-saıası jumys komıteti tarapynan elimizdiń 3 oblysynda «Qazaqstannyń bolashaǵy - qazaq tilinde» atty sharalar ótkizildi. Osy joba aıasynda jumys toby quramynda belgili saıasattanýshylar men qoǵam qaıratkerleri, jergilikti jerlerdegi tilderdi damytý jáne ishki saıasat basqarmalarynyń basshylary boldy.

«Bir aıǵa jýyq ýaqyt ishinde Shyǵys Qazaqstan, Pavlodar, Qaraǵandy oblystaryndaǵy qalalar men aýdan ortalyqtarynda 39 kezdesý ótkizdik. Bul baǵdarlama arnaıy orystildi aýdıtorııaǵa arnalǵan. Maqsatymyz - orystildi azamattarǵa memlekettik tilge degen pozıtıvtik kózqaras qalyptastyrý. Olarǵa Qazaqstandaǵy memlekettik tildiń qazirgi jaǵdaıyn tanystyrý, pikirlesý, usynystaryn tyńdaý, elimizdegi memlekettik tildiń ahýalyna birge taldaý jasap, tildi qoldaný aıasyn keńeıtýge negizdelgen nasıhat baǵytyndaǵy jumystar júrgizildi», - dedi D. Kóshim.

Onyń sózine qaraǵanda, atalǵan oblystarda dóńgelek ústel, kezdesý, brıfıng túrinde ótken sharalarǵa 2 myńnan astam azamattar qatysty.

«Memleket qazaq tilin úıretýge qolynan kelgen jaǵdaıdy jasap jatyr. Ortalyqtar ashyldy, qajetti kitaptar shyǵarylyp jatyr. Osy oraıda biz orystildi azamattardyń memlekettik tildi nelikten baıaý ıgerip jatqandyǵy turǵysynda ózderin oılandyrýǵa tyrystyq. Árıne, balalarynyń bolashaǵy qazaq tiline baılanysty ekenin áńgimeledik. Osy sharalardaǵy qýanarlyq jaǵdaı - orystildi azamattar kóptegen usynystardy bizge aıtty. Onyń jeke esep túrinde shyǵaramyz. Meniń ózime unaǵan pikirdiń birine toqtalatyn bolsam, orystildi azamattar «mektep bitirgen ýaqytta balalardyń barlyǵy qazaq tilinen test tapsyrý kerektigin jáne onyń baly JOO-ǵa túsken kezde eseptelinýi qajet» dep oı túıdi. Sonymen qatar balabaqshalardyń barlyǵy qazaq tilinde bolýy qajet ekenin alǵa tartty. Olardyń paıymynsha, sol kezde jetkinshekterdiń mektepke deıingi kezeńde qazaq til bazasy qalyptasady», - dedi qoǵam qaıratkeri.

Sonymen qatar D. Kóshim kóptegen jerlerde qazaq tilindegi mektepterge ózge ult ókilderiniń balalaryn oqýǵa berýi kóbeıip kele jatqanyn atap ótti. «Taǵy bir aıta keter jaıt, balalaryn qazaq tilindegi balabaqshalar men mektepke deıingi ortalyqtarǵa berip jatqandar eki-úsh esege kóp. Osy oraıda qazaq mektepterine baratyn basqa ult ókilderiniń legi artady. Bul úlken ózgeris», - dedi ol.

Belgili bolǵandaı, osy kezdesýler qorytyndysy boıynsha taldamaly esep jasalǵan, onda tıisti vedomstvolarǵa usynystar men anyqtalamalar qamtylyp otyr.