Úsh oblysta bastalǵan kooperatsııalyq tizbek búkil respýblıkada jalǵasyn tabady

NUR-SULTAN. QazAqparat – Almaty, Túrkistan, Jambyl oblystarynan bastaý alǵan «Alqaptan – sórege deıin» kooperatsııalyq tizbegi búkil respýblıkada jalǵasyn tabady. Bul týraly Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«Óziniń óndirgen ónimin, ásirise qııar, alma, qyzanaq saqtaıtyn oryndar ońtústik óńirlerde jetkiliksiz. Sondyqtan Úkimet tarapynan eki túrli jumys júrgizilip jatyr. Birinshiden jeti oblysta kóterme-taratý ortalyqtarynyń jelisin salý máselesi kóterilýde. Ol kóterme-taratý ortalyqtarynyń negizgi mindeti – sharýalardan kelip túsken azyq-túlik taýarlaryn saqtaý, sodan keıin úlken kólemde satý», - dedi Saparhan Omarov OKQ-da ótken baspasóz máslıhatynda.

Mınıstrdiń aıtýynsha bıyl Almaty, Túrkistan, Jambyl oblystarynda «Alqaptan – sórege deıin» degen aýyldaǵy kooperatsııalyq tizbekti damytý jumysy bastalǵan.

«Bul – saýda oryndary men sharýalardy qosyp, deldalsyz tikeleı saýda jasaýǵa múmkindik jasaý. Bıyl úsh oblysta júrip jatyr. Oǵan respýblıkalyq bıýdjetten qosymsha qarajat bólindi. Osy jyldyń aıaǵyna qaraı tizbek jaqsy jumys isteıtin bolsa, ol bastamany basqa da oblysta jalǵastyratyn bolamyz», - dedi ol.