Úsh oblystyń aýmaǵynda áskerı tehnıkalar júrip ótedi - Qorǵanys mınıstrligi
ASTANA. KAZINFORM – Qarýly kúshterdiń jaýyngerlik daıyndyq baǵdarlamasy sheńberinde 11-19 naýryz aralyǵynda Qaraǵandy oblysynyń aýmaǵynda eki jaqty komandalyq-shtabtyq oqý-jattyǵý ótedi.
Qorǵanys mınıstrligi baspasóz qyzmetiniń málimetinshe, jaýyngerlik daıyndyq is-sharalary kezinde Qaraǵandy, Almaty, Jetisý oblystarynyń aýmaǵyn sarbazdar men tehnıkalar basyp ótedi.
«Oqý-jaýyngerlik mindetterdi pysyqtaý maqsatynda bólimsheler polıgondarǵa temir jol, áýe jáne avtomobıl kóligi arqyly aralas tásilmen marsh jasaıdy. Keıin turaqty ornalasý pýnktterine oralady. Qorǵanys mınıstrligi atalǵan kezeńde óńirdiń jekelegen aýdandarynda shekteý sharalary engizilýi múmkin ekenin habarlaıdy. Osyǵan baılanysty azamattardan ótip jatqan oqý-jattyǵýlarǵa túsinistikpen qaraýdy jáne tynyshtyq saqtaýdy suraımyz. Sonymen qatar áleýmettik jelilerdi paıdalanýshylardan áskerı tehnıkanyń qozǵalysy týraly jalǵan habarlamalar men beınematerıaldar taratpaýdy jáne tek resmı aqparat kózderine senýdi suraımyz», - delingen málimdemede.
Esterińizge sala keteıik, qoldanystaǵy zańnamada jalǵan aqparat taratqany úshin qylmystyq jaýapkershilik qarastyrylǵan.
