Úsh oblysta júktiligi aýyr ótken áıelderge pansıonattar ashyldy
ASTANA. KAZINFORM – Densaýlyq saqtaý mınıstri Aqmaral Álnazarova Úkimet otyrysynda júkti áıelderge júrgiziletin jańa skrınıngter men baǵdarlamalar týraly aıtyp berdi.
Onyń aıtýynsha, bıyl alǵash ret bolashaq analarǵa arnalǵan «Analar saýlyǵy» baǵdarlamasy iske qosylyp, áıelderdi 12 túrli zertteýden ótkizý jáne júktilikke daıyndaý úshin 5,1 mlrd teńge bólindi.
– Byltyr 22 oblystyq perınataldyq ortalyq quramynda «Uryqty qorǵaý ortalyqtary» qurylyp, júkti əıelderge medıtsınalyq kómektiń qoljetimdigin arttyrý maqsatynda «Bir kúndik klınıka» uıymdastyryldy. Onda 100 myńnan astam júkti áıel 500 myńǵa jýyq tekserýden ótip, nətıjesinde uryqtyń damý aqaýlaryn erte anyqtaý 13%-ǵa artty. Osy ortalyqtardy zamanaýı medıtsınalyq tehnıkamen jabdyqtaýǵa ákimderdiń jergilikti bıýdjetten qarjy qarastyrýyn suraımyz, – dedi A. Álnazarova Úkimettiń búgingi otyrysynda.
Elimizde alǵash ret «Fetaldy medıtsına» jańa tehnologııasy engizilip, jatyrishilik 71 operatsııa jasalyp, nátıjesinde 96 náresteniń ómiri saqtaldy. Bıyldan bastap emhanalarda pedıatrııalyq bólimsheler ashylyp, 100 damý jáne erte aralasý ortalyqtary jasaqtaldy.
Júkti áıelder men fertıldi jastaǵy áıelderdiń densaýlyǵyna tsıfrlik baqylaý maqsatynda 20 sıtýatsııalyq ortalyq uıymdastyrylyp, júktiliktiń asqynýyn anyqtap, der kezinde emdeýge jatqyzýǵa múmkindik berdi.
– Shalǵaıdaǵy aýyldyq jerlerde joǵary syn-qater tobyndaǵy júkti áıelderdi aldyn ala emdeýge jatqyzýǵa, asqynǵan bosanýdan keıingi kezeńde áıelderdi ońaltýǵa arnalǵan «Salaýatty ana» pansıonattary ashylýda. Búginde pansıonattar Túrkistan, Shyǵys Qazaqstan, Aqmola oblystarynda ashylyp, júkti áıelderge qyzmet kórsetip jatyr. Basqa óńirlerdiń ákimderinen jyl sońyna deıin oblys ortalyqtarynda pansıonat ashý máselesin sheshýdi suraımyz, – dedi Densaýlyq saqtaý mınıstri.
Aıta keteıik, jyl basynan beri elimizde ana óliminiń kórsetkishi 10%-ǵa, náreste ólimi kórsetkishi 26%-ǵa tómendedi.
Buǵan deıin Aqmaral Álnazarova aýyldyq jerlerdegi medıtsınalyq kadr tapshylyǵy máselesi qalaı sheshiletinin aıtyp bergen edi.