Úsh oblysta tek sheteldikterge arnalǵan kazınolar ashylady
ASTANA. KAZINFORM — Mańǵystaý, Almaty, Jetisý oblystarynda tek qaltaly sheteldikter ǵana kire alatyn kazınolar ashylmaq.
Týrızm jáne sport mınıstrliginiń alqa májilisinde vıtse-mınıstr Mıras Tólebaev osyndaı málimet berdi.
— Týrızmdi damytý úshin Mańǵystaý, Almaty, Jetisý oblystarynda sheteldikterge arnalǵan oıyn aımaqtaryn ashý jumystary pysyqtalyp jatyr. Bul kazınolar aýqatty sheteldikterdiń aǵynyn arttyrady jáne týrızm klasteriniń basty ortalyǵyna aınalady dep kútemiz. Dál osyndaı Makao, Sıngapýr, Malaızııa jáne Fılıppın elderinde týrızmniń damýyna qosymsha serpin berip otyr. Mundaı tásil Qazaqstanda da jemis beredi dep paıymdaımyz. Jańa kazınolar myńdaǵan jumys oryndaryn ashyp, mıllıardtaǵan salyq túsiredi, — dedi Mıras Tólebaev.
Vıtse-mınıstr bul oıyn aımaqtarynda tek kazıno ǵana ashýǵa ruqsat etiletinin atap ótti.
— Oǵan Qazaqstan azamattary qatysa almaıdy. Tek sheteldikter ǵana oınaýǵa ruqsat beriledi, — dedi ol.
Oıyn bıznesi jáne lotoreıany retteý komıteti tóraǵasynyń mindetin atqarýshy Ádilet Turǵanbaevtyń sózinshe, bul jobalarǵa Qytaı, Reseı, Eýroodaq ınvestorlary tartylýy múmkin. Investorlarǵa kazınoǵa qoıylatyn ár ústel men oıyn avtomattaryna salynatyn alym mólsherin eki ese qysqartyp, sheteldik týrısterdi utystan alǵan jeke tabys salyǵynan bosatý kózdelip otyr.
Buǵan deıin Mańǵystaý oblysynda Baký men Dýbaı tájirıbesi boıynsha kazınolar ashylatynyn jazǵan edik.