Úsh oblysta aýa temperatýrasy 40 gradýstan joǵary bolady - Qazgıdromet

ASTANA. KAZINFORM – «Qazgıdromet» RMK-sy shildeniń 21-i kúngi kún raıy boljamyn jarııalady.

Kásiporynnyń derekterine qaraǵanda, respýblıkamyzdyń basym bóliginde antıtsıklon jotasy yqpalynan kún jaýyn-shashynsyz bolady, tek elimizdiń shyǵysynda, ońtústik-shyǵysynyń taýly aýdandarynda atmosferalyq frontaldy bólikterdiń ótýimen baılanysty kún qubylmaly bolady, naızaǵaı oınap, jańbyr jaýady. Qazaqstannyń shyǵysynda burshaq jaýyp, daýyl turady, túnde qatty jańbyr jaýady.

Respýblıka boıynsha jel kúsheıip, ońtústik oblystarda shańdy daýyl turady, elimizdiń soltústiginde, soltústik-batysynda túnde jáne tańǵy saǵattarda tuman túsedi.

Kúndiz Mańǵystaý oblysynda 38-42 gradýs ystyq bolady, Atyraý oblysynda 35-39 gradýs, Batys Qazaqstan oblysynda 35-37 gradýs, Jetisý oblysy men Almaty oblysynda 35-38 gradýs, Abaı oblysynyń ońtústiginde 35 gradýs, Túrkistan oblysynyń ońtústiginde 42 gradýs ystyq bolady. Sondaı-aq kúndiz Atyraý oblysynyń batysynda 41 gradýs, Mańǵystaý oblysynyń ońtústiginde 43 gradýs ystyq bolady.

Shyǵys Qazaqstan oblysy men Abaı oblysynda, Batys Qazaqstan oblysynyń soltústiginde, shyǵysynda, ortalyǵynda, Atyraý oblysynyń batysynda, shyǵysynda, Qostanaı oblysynyń ońtústik-shyǵysynda, Aqtóbe oblysynyń soltústik-batysynda, soltústik-shyǵysynda, Qaraǵandy oblysynyń soltústiginde, shyǵysynda, Ulytaý oblysynyń soltústiginde, Aqmola oblysynyń batysynda, ońtústiginde, ortalyǵynda, Pavlodar oblysynyń ońtústiginde, shyǵysynda joǵary órt qaýpi saqtalady.

Mańǵystaý, Qyzylorda, Túrkistan, Almaty oblystarynda, Jetisý oblysynda, Jambyl oblysynyń batysynda, ońtústiginde, shyǵysynda, Atyraý oblysynyń soltústiginde, ońtústiginde, Qaraǵandy oblysynyń batysynda, ońtústiginde, Ulytaý oblysynyń ońtústiginde, shyǵysynda, ortalyǵynda, Aqtóbe oblysynyń ońtústiginde, Qostanaı oblysynyń ońtústik-batysynda, Batys Qazaqstan oblysynyń batysynda, Abaı oblysynyń ońtústiginde tótenshe órt qaýpi kútiledi.

Osyǵan deıin Koreıada tolassyz jaýynnan 14 adam qaza taýyp, 12-si iz-túzsiz joǵalǵany týraly jazdyq.