Úsh myńnan astam jas sarbaz Otanǵa adal bolýǵa ant qabyldady
Búkil elimiz boıynsha bir mezgilde úsh myńnan astam áskerge jańa shaqyrylǵan bozbala Otanǵa adal bolýǵa Ant qabyldap, sert berdi.
Qarýly kúshterdiń túrleri men tekteri, áskerı bólimderi, atap aıtqanda Qurlyq áskerleri, Áýe qorǵanysy kúshteri, Áskerı-teńiz kúshteri, Aeroutqyr áskerleri, Raketa men artıllerııa áskerleri jas sarbazdarmen tolyqty.
Ant qabyldaý - árbir áskerı qyzmetshi úshin qasıetti rásim bolyp sanalady. Shara komandırlerdiń, arnaıy shaqyrylǵan ardagerler men ata-analardyń qatysýymen saltanatty jaǵdaıda ótkiziledi. Bul merekeniń mańyzyn arttyra túsedi. Otan aldynda ant qabyldanady, sarbazdar elimizdiń, týǵan týystarynyń, búkil azamattardyń qaýipsizdigin qorǵaýǵa ózderine jaýapkershilik qabyldaıdy.
Merzimdi qyzmet sarbazdaryn 12 aılyq jaýyngerlik oqý kútip tur. Osy ýaqyt aralyǵynda olar áskerı mamandyqty, ózderine berilgen qarýdy meńgerip, qarýly kúshterdiń jalpy áskerı jarǵysyn jadyna saqtaýǵa talpynýy tıis.
Kóktemgi áskerge shaqyrý naýqany jalǵasýda. Áskerı bólimderge endi keletin sarbazdar áskerı ant qabyldaýdan tys qalmaq emes.