Úsh myńǵa jýyq adam Estaı Berkimbaevtyń 150 jyldyq mereıtoıyna jınaldy
EKІBASTUZ. QazAqparat - Ekibastuz qalasynyń Qarajar aýyly mańyndaǵy Áýlıekól jaǵasynda daryndy dala bulbuly, qazaq mýzyka óneriniń shoq juldyzy Estaı Berkimbaevtyń 150 jyldyǵy atap ótildi, dep habarlaıdy QazAqparat pavlodarnews.kz saıtyna silteme jasap.
Mereıtoı aıasynda ulttyq saz-aspaptarynda oınaıtyn mýzykanttardyń respýblıkalyq festıvali, zııaly qaýymnyń shyǵarmashylyq dıalog alańy, jergilikti jáne otandyq ónerpazdardyń kontserti, sondaı-aq ulttyq sport túrlerinen jarystar ótti. Sharaǵa arnaıy 30 kıiz úı boı kóterdi. Mereıtoıǵa barlyǵy úsh myńǵa jýyq adam qatysty.
Pavlodar oblysynyń ákimi Bolat Baqaýov Estaı Berkimbaevtyń án áleminde shoqtyǵy bıik tulǵa ekenin atap ótti.
«Estaı Berkimbaıuly el tarıhynda erekshe oryn alǵan, ánderi alty aýyzǵa taraǵan talantty daryn ıesi. Búgingi kúni mahabbattyń sımvolyna aınalǵan «Qusnı Qorlan» ánin bilmeıtin adam kemde-kem. Eline óshpes óner, asyl mura qaldyrǵan Estaı aqynnyń orny qazaq halqy úshin qashan da erekshe dep bilemin. Estaıdyń án jyryn keıingi urpaqqa jetkizý - perzenttik boryshymyz. Estaı babamyzdy zerttep, izdeıtin urpaǵy barda, qazaq halqy barda - onyń murasy óshpek emes», -dedi aımaq basshysy.
Mereıtoı ıesiniń qurmetine uıymdastyrylǵan dıalog alańynda Bolat Baqaýov Los Andjeleste ótken halyqarylyq baıqaýda jeńiske jetken «Bastaý» dombyrashylar tobyn quttyqtap, oblys atynan shejire syılady.
«Bastaý» tobynda óner kórsetetin Temirlan Oljabaı - Estaı Berkimbaıulynyń jıeni. Atalmysh sharada uıymdastyrylǵan ulttyq saz-aspaptarynda oınaıtyn ónerpazdardyń festıvali eldi erekshe kúıge bóledi. Onda Qaraǵandy, Petropavl, Astana, Oral qalalarynan kelgen ánshiler men «Qorqyt» respýblıkalyq etno-folklorlyq ansambili óner kórsetti.
Aıta keteıik, mereıtoı aıasynda ótken zııaly qaýymnyń dıalog alańynda Ekibastuz qalasyndaǵy M.Glınka atyndaǵy balalar mýzyka mektebine Estaı Berkimbaevtyń esimin berý usynyldy. Bul bastamany belgili kompozıtor, QR Memlekettik syılyǵynyń laýreaty, QR Kompozıtorlar odaǵynyń tóraıymy Balnur Qydyrbek kóterdi.
