Úsh mýshketer keıipkeri d’Artanıannyń súıegi tabyldy degen boljam bar

ASTANA. KAZINFORM – Nıderlandta Maastrıht qalasyndaǵy Áýlıe Petr men Pavel shirkeýinde jóndeý jumystary kezinde adam qańqasy tabyldy, dep habarlaıdy DW.

 Ol álemge áıgili «Úsh mýshketer» romanynyń avtory Aleksandr Dıýmany shabyttandyrǵan tarıhı tulǵa — ataqty mýshketer d’Artanıannyń súıekteri bolýy múmkin degen boljam bar.

Qańqanyń jasy kem degende birneshe ǵasyr dep baǵalanyp otyr. Ol shirkeýdiń qurbandyq ústeliniń dál aldynda tabylǵan.

Mamandardyń aıtýynsha, bul shirkeý sol jerde buryn bolǵan ǵımarattyń ekinshi nemese úshinshi nusqasy bolýy yqtımal. 2026 jyldyń aqpanynda edenniń bir bóligi shógip ketken. Sol jerdi ashý barysynda qabir anyqtalǵan.

Alynǵan DNQ úlgisi Mıýnhendegi zerthanaǵa jiberilip, ol d’Artanıannyń yqtımal urpaqtarynyń DNQ-symen salystyrylady.

Shirkeý dıakony Ios Valke bul súıek shynymen d’Artanıandiki bolýy múmkin ekenin joqqa shyǵarmaıdy.

— Ol qasıetti jerge, qurbandyq ústeliniń astyna jerlengen. Qabirden sol kezeńge tıesili frantsýz monetasy tabyldy. Al ony óltirgen oq keýde tusynda bolǵan, tarıhı derekterde de solaı sıpattalǵan. Dálelder daýsyz, — dedi ol.

Frantsııada d’Artanıan ulttyq qaharman sanalady. Batyl gaskondyq jas Parıjge patsha mýshketeri bolý úshin attanǵan. Ol 1611 jyly Frantsııanyń ońtústigindegi Lýpıak qalasynda dúnıege kelgen. Aǵasynyń qaıtys bolýynan keıin ol d’Artanıan grafy ataǵyn muraǵa alǵan, keıin korol gvardııasynyń sarbazy boldy.

Ol 1673 jylǵy 25 maýsymda Maastrıht qorshaýy kezinde qaza tapty. Tarıhshylardyń pikirinshe, sol kezdegi qatty ystyqqa baılanysty onyń denesi shuǵyl jerlengen, sondyqtan naqty jerleý orny belgisiz kúıde qalǵan. Alaıda kóptegen derek dál osy Áýlıe Petr men Pavel shirkeýin kórsetedi, sebebi qorshaý kezinde munda áskerı lager ornalasqan bolatyn.

Aıta ketelik Ulybrıtanııanyń Brıstol murajaıynan 600-den astam qundy jádiger urlanǵany týraly jazǵan edik.