Úsh myńnan astam jetim bala asyrap alyndy – mınıstrlik

ASTANA. KAZINFORM – Bıyl elimizde jetim balalardy otbasyǵa ornalastyrýdyń jańa túri engizildi. 

– Ótken oqý jylynyń qorytyndysy boıynsha balalardyń quqyǵy men qaýipsizdigin qorǵaý úshin 6 zań jáne 94 normatıvtik quqyqtyq akt qabyldandy. Sondaı-aq Bala quqyǵy týraly BUU konventsııasynyń fakýltatıvtik hattamasy ratıfıkatsııalandy. Bıyl qańtarda Jenevada ótken BUU sessııasynda Qazaqstannyń bala quqyǵyn qorǵaý salasyndaǵy reformasyna joǵary baǵa berildi. Nátıjesinde balalar úıinde tárbıelengen jetim balalardyń 82 paıyzy otbasyǵa ornalastyryldy, 3 myńnan astam bala óz shańyraǵyn tapty. 360 eresek adam tálimger atandy, al qorǵanshylyq organdarynyń shtattyq sany 3 esege artty. 2025 jylǵy 1 shildeden bastap otbasyǵa ornalastyrýdyń jańa túri, ıaǵnı kásibı qabyldaýshy otbasy ınstıtýty engizildi, - degen aqparat aldyq Oqý-aǵartý mınıstrliginen. 

Sondaı-aq mınıstrlik mekteptegi býllıng úshin ákimshilik jaýapkershilik baryn eske saldy. 

– Otandyq «DOSBOLLiKe» atty antıbýllıng baǵdarlamasy engizilip jatyr. Sonymen qatar «Kıber Tumar» jáne «Ata-ana baqylaýy» aktsııasy uıymdastyryldy, «Meniń baýyrym» jobasy júzege asyrylyp jatyr. Memleket basshysynyń tapsyrmasy boıynsha eldiń 20 óńirinde psıhologııalyq qoldaý ortalyqtary ashyldy. Onda 250 myńnan astam oqýshy men olardyń otbasy kómek aldy. Medıatsııa qyzmeti men balalar ombýdsmeni jumys isteıdi, tálimgerlerge psıhologııalyq daıyndyq júrgizilip jatyr, - deıdi vedomstvodan. 

Aıta keteıik, búginde elimizde 360-tan asa tálimger jetim balalarǵa ómirlik jol siltep júr.