Úsh myńnan astam atyraýlyqtyń kólik salyǵyna 250 mln teńge qaryzy bar
ATYRAÝ. KAZINFORM — Atyraý oblysynda 3 myńnan astam adam kólik salyǵy úshin 250 mln teńge bereshegin tólemeı júr.
Atyraý oblystyq memlekettik kirister departamentiniń bólim basshysy Gúljan Qabdrahmanovanyń aıtýynsha, 112 myńnan astam jeke tulǵanyń atyna 170 myńǵa jýyq kólik tirkelgen. Eseptelgen salyq somasy 3,3 mlrd teńgeni quraıdy. Onyń ishinde 3246 adamnyń bereshegi bar.
— Jeke tulǵalardyń menshigindegi kóliktiń salyǵyn esepteý aılyq eseptik kórsetkish negizinde júrgiziledi. Bul júıege sáıkes, 2013 jylǵy 31 jeltoqsannan keıin shyǵarylǵan nemese elimizge ákelingen, qozǵaltqysh kólemi 3000 tekshe sm-den asatyn jeńil avtomobılderge joǵary mólsherleme qoldanylatyny naqty bekitildi. Salyq tóleý jeke tulǵanyń turǵylyqty jeri boıynsha júzege asyrylady. Al esepteý kezeńi bir jyl aralyǵyn qamtıdy. Jeke tulǵanyń salyqtyq bereshegi túzilip, ýaqytynda tólenbese, alǵashqy habarlama salyqtyq bereshek qalyptasqan kúnnen 20 jumys kúninen keshiktirmeı jiberiledi. Tolyq tólem jasalmasa, 30 jumys kúninen keıin májbúrli túrde óndirý sharalary, sonyń ishinde salyq buıryǵyn rásimdeý arqyly áreket qolǵa alynady, — deıdi Gúljan Qabdrahmanova.
Onyń aıtýyna qaraǵanda, zańnamada kólik salyǵynan bosatylatyn nemese jeńildikter qoldanylatyn kategorııalarǵa qatysty naqty erejeler bekitilgen.
— Múgedektigi bar azamattar men keıbir áleýmettik mártebesi joǵary tulǵalarǵa bir avtokólik quraly boıynsha salyq jeńildikteri qarastyrylyp otyr. Jeke tulǵanyń ıeliginde birneshe kólik bolsa, jeńildik eń joǵary salyq somasy bar nysanǵa qatysty qoldanylady. Eger kólik ıesiniń turǵylyqty jeri ózgerse, salyq tóleý jańa mekenjaı boıynsha júrgiziledi. Bizdiń basty mindetimiz — salyqtyq tártipti qatań baqylaý arqyly qarjy júıesiniń turaqtylyǵyn arttyrý jáne azamattardyń quqyqtaryn qorǵaý, — dedi Qabdrahmanova.
Eske sala keteıik, buǵan deıin Atyraýda mekteptiń oqýshylaryn tasymaldaıtyn avtobýs jeke maqsatqa paıdalanylǵanyn jazǵan edik.