Úsh myńnan astam áskerı qyzmetshi tasqyn sýmen kúresip júr – mınıstrlik
ASTANA. KAZINFORM – Elimizdiń Qarýly kúshteri sý basqan óńirlerdiń turǵyndaryn evakýatsııalaý, sý tasqyny qaýpi bar aımaqtarda bóget qoıý, turǵyndarǵa azyq-túlik pen qajetti zattardy jetkizýge kómektesip jatyr. Tolyǵyraq Qorǵanys mınıstrliginiń resmı ókili Rýslan Jangýlın aıtyp berdi.
«Sý tasqynyna qarsy is-sharalarǵa Qazaqstan Respýblıkasy Qarýly kúshterinen 3 169 áskerı qyzmetshi, 242 birlik avtomobıl tehnıkasy, 4 armııalyq avıatsııa tikushaǵy, 3 áskerı-kóliktik ushaq, 2 Ulttyq ulan avıatsııasy jumyldyryldy. Ásker avıatsııasy eldi mekenderden 293 adamdy evakýatsııalady, 15 adam jáne 11,7 tonna júk tasymaldandy. Sonymen qatar Petropavl, Oral, Atyraý oblystaryna áskerı-kóliktik avıatsııa ushaqtarymen gýmanıtarlyq kómek jetkizildi. Áskerı ushqyshtar barlyǵy 2 951 adamdy, onyń ishinde 811 balany evakýatsııalady», - dedi Rýslan Jangýlın OKQ-de ótken brıfıngide.
Onyń aıtýynsha, Qarýly kúshter jeke quramynyń kúshimen ózender, kólder men eldi mekender mańyndaǵy sý jaǵalaýlaryna 174 myńnan astam qap qum tóseldi.
Odan ári Qorǵanys mınıstrliginiń resmı ókili Qarýly kúshterdiń kómegimen atqarylyp jatqan jumystar týraly ár óńirge jeke toqtaldy.
Aqtóbe oblysy
Oıyl eldi mekeniniń aýdanynda áskerı ınjenerler parom ótkelin jasady. Bul parom arqyly barlyǵy 1568 adam, 137 birlik tehnıka jáne 20 tonnadan astam júk tasymaldandy.
Aqtóbe garnızony áskerı qyzmetshileriniń birikken jasaǵy Qurylys jáne Jaısańbaı eldi mekenderinde sý tasqynynyń aldyn alý boıynsha kómek kórsetý mindetterin oryndady.
Atyraý oblysy
Mahambet, Jańatalap, Talqaıran jáne Saraıshyq aýyldarynyń aınalasyna qum toltyrylǵan qapshyqtardy daıyndaý, olardy qalaý (qoıý) jumystary júrgizildi, sondaı-aq Jaıyq jáne Oral ózenderiniń arnasyn kúsheıtýge jumyldyryldy.
Mahambet, Esbol, Eńbekshi, Aqqaıyń, Aqtoǵaı, Jalǵansaı, Esipbol, Qurylys, Inderbor, Órlik eldi mekenderiniń, Almaly, Pamıat Ilıcha, Balyqshy eldi mekenderiniń, Aqjar-Aqsaı aýdanynyń aınalasyndaǵy Jaıyq ózeniniń bógetteri men jaǵalaý boıyn nyǵaıtýǵa «Ońtústik» óńirlik qolbasshylyǵynyń áskerı qyzmetshileri jiberildi. 41 myńnan astam qap qum daıyndalyp, tóseldi.
Aqtaý avıabazasynyń ekıpajy barlaý soqqy berýshi ushqyshsyz basqarylatyn qurylǵysynyń kómegimen Aqtaý-Atyraý-Aqtaý baǵyty boıynsha áýe baqylaýyn jáne áýe barlaýyn júrgizýdi jalǵastyrýda.
Batys Qazaqstan oblysy
Qarýly kúshterdiń áskerı qyzmetshileri qum salynǵan qaptardy daıyndap, tóseý, sý basýy yqtımal jerlerdi nyǵaıtý boıynsha jumystar júrgizdi, Jaıyq ózeni arnasynyń jaǵalaýy tosqaýyl bógettermen kúsheıtildi. Osy syndy jumystar Býmakól aýylynda jáne Baıterek aýdanynyń 9 eldi mekeninde oryndaldy.
Desanttyq-shabýyldaý áskerleriniń áskerı qyzmetshileri Naberejnaıa, Podstepnoe, Baıqońys, Darınskoe, Rýbejnoe aýyldarynda bógetter turǵyzdy. Barlyǵy 12 myńnan astam qap qum daıyndalyp, tóseldi.
Soltústik Qazaqstan oblysy
Áskerı qyzmetshiler Petropavl qalasynyń «Qyzyljar Sý» sý arnasynyń aýmaǵynda, Beskól aýylynda jumysyn jalǵastyryp, qala mańyndaǵy aınalma joldy nyǵaıtý mindetterin oryndady. Avtotsısternanyń kómegimen eldi mekenderdi aýyz sýmen qamtamasyz etý uıymdastyryldy.
Aqmola oblysy
Esil aýdany Zarechnyı aýylynda elordalyq erekshe maqsattaǵy brıgadanyń áskerı qyzmetshileri tirshilik etý obektilerin (ákimdik, sý sorǵy stantsııasy, naýbaıhana, mektep, televyshka) elektr qýatymen qamtamasyz etý jumystaryn jalǵastyrdy.
Shyǵys Qazaqstan oblysy
Áskerı qyzmetshiler Marqakól aýdany Boran aýyly mańyndaǵy joldyń qıraǵan ýchaskesinde jabdyqtalǵan kópir ótkeli arqyly adamdar men kólikti ótkizýdi júzege asyrdy.
