Úsh myńnan astam áskerı qyzmetshi sý tasqynymen kúresýde
ASTANA. KAZINFORM – QR Qorǵanys mınıstrliginiń resmı ókili Rýslan Jangýlın sý tasqynymen kúres jumystaryna tartylǵan áskerı qyzmetshiler týraly aıtyp berdi.
«Jalpy 27 naýryz ben 9 sáýir aralyǵynda is-sharalarǵa 3 myńnan astam áskerı qyzmetshi, 173 avtokólik tehnıkasy, 14 tikushaq, 4 áskerı-kóliktik ushaq jumyldyryldy. Qarýly kúshterdiń jeke quramy kúshimen 2 359 adam, onyń ishinde 745 bala evakýatsııalandy, 115 tonnadan astam júk tasymaldandy», - dedi R. Jangýlın Ortalyq kommýnıkatsııalar qyzmetinde ótken baspasóz máslıhatynda.
Ótken táýlikte sý tasqynyna qarsy is-sharalarǵa 1500-den astam áskerı qyzmetshi, 104 tehnıka jáne 3 armııalyq avıatsııa tikushaǵy jumyldyrylǵan.
Áýe kóligimen 39 adam tasymaldandy, 4 tonnadan astam júk jetkizilip, 6 myńnan asa qapshyqqa qum toltyrylyp, tóselgen.
«SQO aýmaqtyq qorǵanys brıgadasynyń jaýyngerleri Petropavl mańyndaǵy Zarechnyı aýylyna Esil ózeniniń bógetin nyǵaıtý úshin 1 050 qapshyq qum daıyndady. TJ departamentterimen jáne polıtsııa qyzmetkerlerimen birge olar Zarechnyı turǵyndaryn evakýatsııalaýǵa qatysty. Sondaı-aq, Beskól aýylynda Astanadan kelgen 68665 áskerı bóliminiń áskerı qyzmetshileri aýyldyń aınalasyn nyǵaıtý úshin 8 myń qap qum toltyrdy. Ekinshi top «QazAvtoJol» Ulttyq kompanııasy» AQ mamandarymen birlesip, Petropavl mańyndaǵy aınalma joldy nyǵaıtý jumystaryn jalǵastyrýda», - dedi spıker.
Atyraý oblysynyń Qulsary qalasynda Mańǵystaý oblysyndaǵy aýmaqtyq qorǵanys brıgadasynyń 187 áskerı qyzmetshisi aýysymmen bógetti qalpyna keltirýmen jáne qalanyń aınalasyna qum salynǵan qap tóseýmen aınalysýda. Osyndaı jumystardy «Batys» óńirlik qolbasshylyǵynyń ózge de áskerı bólimderiniń jeke quramy atqaryp jatyr.
Muz keptelisterin joıý jáne sý aǵynyn báseńdetý úshin áskerı ınjenerler Qulsary qalasynan 30 shaqyrym qashyqtyqtaǵy Jem ózeninde jarý jumystaryn jalǵastyrýda. Osy ýaqytqa deıin barlyǵy 8 jarylys ótkizilgen.
Aqtóbe oblysy Oıyl ózenindegi parom ótkelimen Qonaev garnızonynyń áskerı ınjenerleri 235 turǵyndy evakýatsııalap, 29 tonnaǵa jýyq júk tasymaldady. Jalpy parom ótkeliniń kómegimen 817 azamat evakýtsııalandy, 50 tonnadan asa gýmanıtarlyq kómek, múlik pen júk tasymaldandy. Keleshek eldi mekeniniń qaraýsyz múlkin qorǵaý jónindegi is-sharalarǵa «Batys» óńirlik qolbasshylyǵy 30238 áskerı bóliminiń áskerı qyzmetshileri jumyldy.
Batys Qazaqstan oblysynyń aýmaqtyq qorǵanys brıgadasy Oral qalasynyń Shaǵan aýdanyna tartyldy. Olar 6 shaǵyn aýdanda Qyrǵyzstannan kelgen gýmanıtarlyq júkti túsirýge atsalysqan.
Sondaı-aq, Atyraý oblysynda jergilikti jer ýchaskeleri men eldi mekenderdiń turǵyn alabyn sý basýyna jol bermeý úshin Aqtaý garnızonynan Mahambet aýdanyna 300 teńiz jaıaý áskeri jiberildi.
Aqmola garnızony áskerı bólimderiniń dızeldi jáne benzın generatorlarynyń kómegimen Aqmola oblysy Jarqaıyń aýdany Dalabaı, Tassýat, Tasótkel aýyldarynyń jáne Esil aýdany Zarechnoe aýylynyń turǵyndary jaryqpen qamtamasyz etilgen.
