Úsh mınıstrlik oqytýshylar men stýdentterge «Ulttyq rýhanı jańǵyrý» baǵdarlamasyn tanystyrdy

NUR-SULTAN. QazAqparat - Búgin aqparat jáne qoǵamdyq damý, bilim jáne ǵylym, mádenıet jáne sport mınıstrlikteriniń ókilderi Lev Gýmılev atyndaǵy Eýrazııa ulttyq ýnıversıtetiniń professor-oqytýshy quramymen jáne stýdentterimen kezdesti, dep habarlaıdy QazAqparat.

Kezdesýge ýnıversıtettiń rektory, UǴM akademıgi Erlan Sydyqov qatysty. Ol ulttyq baǵdarlamanyń bilim, mádenıet, jastar saıasaty salalaryndaǵy erekshe mańyzdy rólin atap ótti.

QR AQDM Rýhanı jańǵyrý baǵdarlamasyn úılestirý departamentiniń dırektory Ý.Tnalıev «Ulttyq rýhanı jańǵyrý» ulttyq jobasynyń negizgi baǵyttary men mindetterimen tanystyrdy.

Bilim jáne ǵylym birinshi vıtse-mınıstri Sh.Karınova memlekettik tildi damytý jáne bilim berý salasyndaǵy ózekti máselelerdi sheshý jónindegi is - sharalar týraly aıtyp berdi.

QR MSM Mádenıet komıtetiniń tóraǵasy A.Ábdýálıev Ulttyq jobanyń «El rýhy» baǵyty boıynsha qarastyrylǵan is-sharalarǵa egjeı-tegjeıli toqtaldy.

Bul baǵytty iske asyrý mádenıet salasyndaǵy qyzmetterdiń qoljetimdiligi men sapasyn arttyrýǵa jáne otandyq mádenı ónimdi tanymal etýge baǵyttalǵan.

Óz kezeginde, QR AQDM Jastar jáne otbasy isteri komıtetiniń tóraǵasy Sh.Baımanov «Táýelsizdik urpaqtary» baǵytynda qarastyrylǵan jastardyń negizgi suranystaryn, sonyń ishinde turǵyn úı, jumyspen qamtý, bilim berý, jastardy qoǵamdyq paıdaly qyzmetke tartý, NEET sanatyndaǵy jastardy áleýmettendirý máselelerin sheshýge baǵyttalǵan sharalarǵa toqtaldy.

Esterińizge sala keteıik, « Ulttyq rýhanı jańǵyrý «ulttyq jobasy negizgiúsh baǵyt boıynsha júzege asyrylady, olardy oryndaýǵa birden úsh mınıstrlik qatysady.

Qujatqa jeti mindet, 20-dan astam kórsetkish jáne 60-tan astam iri is-sharalar kiredi.

Ulttyq joba Memleket basshysy Qasym-Jomart Toqaevtyń tapsyrmasy boıynsha ázirlendi jáne qazaqstandyq qoǵamnyń mádenıet, aǵartý jáne ulttyq rýh deńgeıin arttyrýǵa baǵyttalǵan.

Sondaı-aq, ulttyq joba - Tuńǵysh Prezıdent-Elbasy Nursultan Nazarbaevtyń baǵdarlamalyq maqalasynda aıtylǵan «Rýhanı jańǵyrý» qundylyqtaryn ilgeriletýdiń kelesi kezeńi.