Úsh mınıstr men bir oblys ákimi Qazaqstan fýtbol federatsııasyna múshe bolyp saılandy
ASTANA. QazAqparat - Búgin Qazaqstan fýtbol federatsııasynyń XVII konferentsııasynda atalǵan uıymnyń atqarýshy komıtetine jańa músheler saılandy, dep xabarlaıdy QazAqparat tilshisi.
Atap aıtqanda, atqarýshy komıtettiń quramyna QR Aqparat jáne kommýnıktsııalar mınıstri Dáýren Abaev, QR Din isteri jáne azamattyq qoǵam mınıstri Darxan Káletaev, QR Bilim jáne ǵylym mınıstri Erlan Saǵadıev, Qostanaı oblysynyń ákimi Arxımed Muxambetov, "Qaırat" fýtzal klýbynyń basshysy Qaırat Orazbekov, "Astana" klýbynyń prezıdenti Saıan Hamıtjanov, QR Parlament Májilisiniń depýtaty Mıxaıl Chırkov, Shymkent qalasy boıynsha fýtbol federatsııasynyń basshysy Baýyrjan Abdýbaıtov, Qazaqstannyń kásibı fýtbol lıgasynyń jetekshisi Oljas Abraev, QFF prezıdentiniń keńesshisi Seıilda Baıshaqov, QR Ulttyq paralımpıada komıtetiniń tóraǵasy, "Qaırat" fýtbol klýbyn baqylaý keńesiniń basshysy Qaırat Boranbaev, Áıelder fýtbolyn damytý qorynyń ókili Maııa Egimbaeva, Lancaster Group-tyń aktsıoneri Berik Kanıev, metsenat Nıkolaı Meşerıakov saılandy.
Qazaqstan fýtbol federatsııasynyń prezıdenti Ádilbek Jaqsybekov atqarýshy komıtettiń jańa múshelerin quttyqtap, olardyń óz erkimen otandyq fýtboldy damytýǵa nıet bildirgenin jetkizdi.
"Ásirese, memlekettik organdardyń basshylary, mınıstrler men oblys jetekshisi ýaqyttyń tyǵyzdyǵyna, jumystyń kóptigine qaramaı, qosymsha júktemeni alyp, otandyq fýtboldy damytýǵa nıet bildirip otyr. Árıne, olar fýtboldy jaqsy kóredi. Degenmen, dál osy azamattar otandyq fýtboldyń damýyna úlken úles qosa alady", - dep atap kórsetti Á.Jaqsybekov.
Aıta keteıik, búgingi konferentsııada QFF-nyń "Alǵa, fýtbol! Alǵa, Qazaqstan!" atty jańa strategııasy tanystyryldy. Atalǵan qujatta batyl bir maqsat bar. Ol - fýtboldyń qazaqstandyq stılin qalyptastyrý. Sonyń arqasynda Qazaqstannyń fýtboly barsha álemge tanylady degen jospar bar. Sondaı-aq, jańa strategııada áıelder klýbtaryn arttyrý mindeti belgilenip otyr.
