Úsh merdiger aýystyrǵan Atyraýdaǵy kópir qurylysy qashan aıaqtalady

ATYRAÝ. KAZINFORM – Jylyoı aýdany Qulsary qalasynda tasqynnan zardap shekken kópirdiń qurylysy sozylyp ketti. Bıyl kóktemde ákimdik jumysty qazanda aıaqtaýdy josparlanǵan edi. Alaıda merdiger mekeme birneshe márte aýysqandyqtan jobany aıaqtaý merzimi jyl sońyna uzardy.

v
Foto: Kazinform

Kópir qurylysynyń uzaqqa sozylýy qala turǵyndary men kásipkerlerine qolaısyzdyq týǵyzǵan. Jol qozǵalysy shektelgendikten, turǵyndar kanaldyń arǵy betine aınalma jolmen qatynaýǵa májbúr. Al kópir mańyndaǵy saýda oryndaryna kelýshiler azaıyp, keıbir kásipkerler jalǵa alý baǵasyn tómendetken.

Qazir qurylys alańynda kópirdiń negizgi bólikterin jalǵaý jáne monolıttik jumys júrgizilip jatyr. Ýchaske basshysynyń aıtýynsha, kelesi kezeńde armatýra tóselip, beton quıylady. Beton qatqannan keıin asfalt tóselip, jaryq shamdary ornatylady.

Jaýapty bólim ókilderiniń málimetinshe, qurylystyń uzaqqa sozylýyna merdiger mekemelerge qatysty másele sebep bolǵan. Alǵashqy merdiger kelisimsharttaǵy mindettemelerin oryndamaǵan. Onymen aradaǵy daý eki ret sotta qaralǵan. Keıin tartylǵan ekinshi merdiger de jumysty jalǵastyrmaǵan. Qazir nysandy aıaqtaý úshin úshinshi merdiger jumys istep jatyr.

- Birinshi merdigermen eki márte sottastyq. Apellıatsııalyq shaǵym boıynsha da sot protsesteri boldy. Ekinshi merdigermen de birinshi satydaǵy sotta jeńiske jettik. Osyndaı sot protsesteri men basqa da sebepterge baılanysty qurylys osy ýaqytqa deıin sozylyp keldi, – dedi Jylyoı aýdandyq jolaýshylar kóligi jáne avtomobıl joldary bóliminiń basshysy Beket Bozjigitov.

Joba quny – 330 mln teńge . Qazirgi merdigerge qurylysty aıaqtaý úshin qalǵan 180 mıllıon teńge qarajat qarastyrylǵan. Joba boıynsha kópirdiń uzyndyǵy – 24 metr, eni – 15 metr. Nysanda kólik qozǵalysyna arnalǵan jolmen qatar jaıaý júrginshiler ótkeli men jaryqtandyrý júıesi bolady.

Buǵan deıin Atyraý – Oral jáne Atyraý – Inder joldaryn jalǵaıtyn kópirde aýyr júk kólikterine shekteý qoıylǵanyn jazǵan edik.