Úsh memlekette júrgen Qazaqstan azamattaryna arnaıy ushaq jiberiledi

NUR-SULTAN. QazAqparat – Polsha, Ázerbaıjan jáne Grýzııada júrgen Qazaqstan azamattaryn elge alyp kelý úshin arnaıy ushaq jiberiledi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Qazirgi ýaqytta el Úkimeti halyqaralyq avıaqatynastardyń jabylýyna baılanysty eń aldymen, Polsha, Grýzııa jáne Ázerbaıjannan QR azamattaryn qaıtarý týraly sheshim qabyldady. SІM qazaqstandyq azamattardy qaıtarýdy uıymdastyrý barysynda basqa memlekettik organdarmen tyǵyz úılesimdi jumys atqarýda. Qazaqstandyqtardyń úıge qaıtyp oralýyn Air Astana jáne Scat avıakompanııalary tómen baǵamen reısterdi uıymdastyrý arqyly júzege asyrady», - dedi resmı ókil.

Onyń atap ótýinshe, qazirgi ýaqytta Máskeý qalasynyń «Vnýkovo» áýejaıyndaǵy 30-ǵa jýyq qazaqstandyqty elge qaıtarý máselesi sheshilýde. Olardyń qolynda bıletter bar, ushý ýaqyty boıynsha SCAT avıakompanııasymen kelisý jumystary júrip jatyr. Sonymen qatar Reseıdiń basqa da qalalarynan azamattarymyzdy qaıtarý boıynsha qıyndyqtar bar. Atap aıtqanda, Ombyda 26 adam, Novosibirde 8 adam, Ekaterınbýrgte 11 adam, Barnaýl, Samarada 10 adam jáne Chelıabi, Orynbor syndy qalalarda birneshe adam Qazaqstanǵa qaıta almaı otyr.

«Qazir Bishkek qalasynda Atyraýdan kelgen bir top azamatymyz bar. Olardyń arasynda erekshe tasymaldaý sharttary talap etiletin DTsP dıagnozy bar balalar bolǵandyqtan, bul jaǵdaıda Qorǵanys mınıstrliginiń avıatsııasy paıdalanylatyn bolady», - dedi Aıbek Smadııarov.