Úsh megapolıste jastar úshin 12 myń páter salynady
Memleket basshysynyń jumys isteıtin jastardy turǵyn úımen qamtamasyz etý týraly tapsyrmasyna oraı aldaǵy úsh jylda Astana, Almaty jáne Shymkent qalalarynda jastar úshin jalǵa beriletin 12 myń páter salynbaq.
«Qýatty óńirler – el damýynyń draıveri» ulttyq jobasyna sáıkes 2025 jylǵa deıin jyl saıyn 3 myń páter salý jáne satyp alý kózdelip otyr. Bıyl osy maqsatta respýblıkalyq bıýdjetten 21,6 mlrd teńge qarastyrylǵan.
Satyp alý quqyǵynsyz jalǵa beriletin turǵyn úı 5 jyl merzimge beriledi. Osy ýaqytta jastar óz baspanasyna bastapqy jarnany jınap alady dep josparlanǵan. Bosaǵan arendalyq úı kelesi úmitkerge beriledi.
Jalpy alǵanda, 2019 jyldan beri «Nurly jer» memlekettik baǵdarlamasy sheńberinde jumys isteıtin jastarǵa elimizdegi úsh megapolıste 7 myńǵa jýyq jalǵa beriletin páter salynǵan.
Budan bólek, búginde Astana qalasynda «Elorda jastary», Almaty qalasynda «Almaty jastary», Qaraǵandy oblysynda «Qaraǵandy jastary», Jambyl oblysynda «Áýlıe ata jastary», Batys Qazaqstan oblysynda «Oral jastary», Qostanaı oblysynda «Qostanaı jastary», Almaty oblysynda «Alataý jastary», Atyraý oblysynda «Atyraý jastary» turǵyn úı baǵdarlamalary iske qosyldy. Budan bólek, Pavlodar oblysynda «Ertis jastary», Abaı oblysynda «Abaı jastary», Aqtóbe oblysynda «Aqtóbe jastary» óńirlik nesıelendirý baǵdarlamalary daıyndalyp jatyr. Atalǵan baǵdarlamalar jumys isteıtin jastardy turǵyn úımen qamtamasyz etýge baǵyttalǵan. Ol úsh jergilikti bıýdjetten 5 paıyzben nesıe beriledi. Alǵashqy jarna kólemi – 0-10 paıyzdy quraıdy. Nesıelendirý merzimi – 25 jylǵa deıin.
