Úsh kúnnen beri tikushaqpen izdep taba almaǵan qaraǵandylyq malshy tabyldy
QARAǴANDY. KAZINFORM — Qaraǵandy oblysynda qarda júretin kólikpen jylqy izdep ketken jylqyshy tabyldy.
14 aqpanda úsh baqtashy joǵalǵan jylqylardy izdeý úshin mal sharýashylyǵynan shyǵyp ketken. Olar qarda júretin kólikpen jolǵa shyqqan.
Sol kúni tún batqansha ekeýi jumys orynyna qaıtyp kelse, úshinshisi kelesi kúnniń túninde de úıine oralmaǵan.
Osy ýaqytqa deıin onyń janarmaıy taýsylyp qaldy ne bolmasa qarly boranda keri joldy taba almaı qalýy múmkin edi.
37 jastaǵy malshyny áriptesteri men týystary ózderi izdep, keıin polıtsııaǵa habar bergen.
Habar alǵan sátten Nura aýdandyq polıtsııa bóliminiń qyzmetkerleri izdeý jumysyna qosyldy.
Er adamnyń tolyq sıpattamasy bar baǵyttama oblystaǵy barlyq polıtsııa bólimderine jáne jaqyn mańdaǵy oblystarǵa jiberildi.
Keshe polıtseıler ony izdeýge Tótenshe jaǵdaılar mınıstrliginiń tikushaǵyn eki ret attandyrdy, biraq nátıje bolmady.
Jaıaý izdegennen de eshteńe shyqpady.
Al, oblysta aýa temperatýrasy mınýt saıyn tómendep, qarly boranmen qosa, daladaǵy aıaz kúsheıe tústi.
Malshyny tirideı tabamyz degen úmit mınýt sanap sónip bara jatty.
Búgin ýchaskelik ınspektor Bekzat Shokembaevtan aýyl turǵynynyń tabylǵany týraly aqparat kelip tústi.
Joǵalǵan azamat óz aýylynan 120 shaqyrym jerde, ıaǵnı Qaraǵandy men Ulytaý oblystarynyń shekarasyndaǵy qystaqta bolǵan.
Jaǵdaıy birqalypty. Qazirgi ýaqytta ony úıine jetkizip jatyr.
