Úsh kúnde jol erejesin buzýdyń 31 myń faktisi tirkeldi - reıd

NUR-SULTAN. QazAqparat – QR Іshki ister mınıstrligi Ákimshilik polıtsııa komıteti tóraǵasynyń mindetin atqarýshy Jandos Muratálıev jol-kólik oqıǵalarynyń aldyn alý reıd nátıjesin aıtty, dep habarlaıdy QazAqparat tilshisi.

«Jol júrisi qaýipsizdigin qamtamasyz etýde halyq arasynda quqyqtyq túsindirý jumystary keńinen ári turaqty túrde júrgiziledi. Ony uıymdastyrý úshin túrli sharalar qoldanylady. Osylaısha, jol-kólik oqıǵalarynyń aldyn alý boıynsha jumystardy jandandyrý jáne azamattardyń ishki ister organdarynyń qyzmetine degen senimindi arttyrý maqsatynda bıyl 19-21 tamyz aralyǵynda reıdtik is-sharalar ótkizildi», - dedi J. Muratálıev mınıstrlikte ótken brıfıngide.

Osy is-sharaǵa jergilikti atqarýshy organdar, kólikti baqylaý ınspektsııasy, densaýlyq saqtaý, bilim berý organdary, salaýatty ómir saltyn qalyptastyrý jónindegi aýmaqtyq ortalyqtar, múddeli azamattyq qoǵam ınstıtýttary, buqaralyq aqparat quraldary qatysty.

«Atalǵan reıd kezinde 31 myńnan astam jol júrisi qaǵıdalaryn buzý deregi anyqtaldy», - dedi vedomstvo ókili.

Budan buryn habarlanǵandaı, 2022 jyly Qazaqstanda jol-kólik apattary kóbeıdi.