Úsh kúnde jol apatynan 24 adam kóz jumdy
«Alty aı ishinde biz 1,5 myńǵa jýyq adamnyń ómirin saqtap qalǵanymyzǵa qaramastan, ótken juma, senbi, jeksenbi kúnderi shamamen 25 adamnan aıyrylyp qaldyq. Qala mańyndaǵy trassalarda úsh nemese odan da kóp adam shyǵyny bolǵan jol-kólik oqıǵalary jıilep ketkeni qatty alańdatady», - dedi ІІM ÁPK erekshe tapsyrmalar jónindegi aǵa ınspektory Aqtoty Boranova.
Máselen, 15 shildede Abaı oblysynda Lada avtokóliginiń júrgizýshisi kólik rýline ıe bola almaı, avtomashınanyń aýdarylýyna jol berdi. Apat saldarynan úsh adam qaza taýyp, eki adam túrli jaraqat aldy.
16 shilde saǵat 15:00 shamasynda Dossor – Qulsary – Beıneý respýblıkalyq mańyzy bar avtojolynda Chevrolet Sobalt júrgizýshisi qarsy qozǵalys jolaǵyna shyǵyp, Toyota avtokóligimen soqtyǵysqan. Jeti adam qaza taýyp, eki adam jaraqat aldy.
Osy apta da jol-kólik oqıǵalarynan bastaldy. Búgin tańerteń Túrkistan oblysyndaǵy Shaıan aýylynyń mańynda jantúrshigerlik jol-kólik oqıǵasy boldy. Ekpindi – Sozaq oblystyq mańyzy bar tas jolynda Nissan, Toyota Camry jáne Volkswagen Srafter kólikteri soqtyǵysqan. Kólik quraldary qas qaǵym sátte órtke orandy. Oqıǵa ornynda 10 adam qaıtys boldy, 12 adam aýrýhanaǵa jetkizildi. Aldyn ala málimetter boıynsha jol apatyna Nissan avtokóliginiń qarsy júris jolaǵyna shyǵýy sebep bolǵan. Osy jaǵdaılardyń barlyǵy jol júrisine qatysýshylardyń tártibiniń tómendigin jáne júrgizýshilerdiń menmendigin kórsetedi.
Taldaýǵa sáıkes barlyq jol-kólik oqıǵalarynda júrgizýshiler asyǵys júrip, basyp-ozý úshin qarsy jolaqqa shyǵady. Jyldamdyqtyń joǵarylaýyna baılanysty olar avtokólik rýline ıe bola almaı, keleńsiz oqıǵalarǵa tap bolady. Jol apattarynyń 95%-y júrgizýshilerdiń nemquraılyǵy men salǵyrttyǵynan bolady.
«Jol qatelikterdi keshirmeıtinin bári biledi, sondyqtan júrgizýshilerden asyqpaýdy suraımyz. Osy qaıǵyly jol apattaryn eskere otyryp, ákimshilik polıtsııa komıteti jol júrisine qatysýshylardy qaýipsiz júris jyldamdyǵy men avtokólikter arasyndaǵy qashyqtyqty qatań saqtaýǵa shaqyrady. Búgingi tańda elimizdiń joldarynda 1 022 adam qaza taýyp, 7 370 adam jaraqat alǵan. Olardyń ómiri «JKO-ǵa deıin» jáne «keıin» bolyp ekige bólindi, sebebi olardyń qanshasy aman qalatyny jáne qanshasy múgedek bolyp qalatyny belgisiz. Árbir júrgizýshi, jolaýshy, jaıaý júrginshi osyndaı habarlamalardy oqyǵannan keıin nemese kórip-tyńdaǵannan keıin ózi mundaı jaǵdaıǵa ushyramaıdy dep sanaıdy, biraq bul qaıǵyly statıstıkaǵa kirgender de solaı oılaǵan bolatyn.
Qurmetti jol júrisine qatysýshylar, «mende mundaı bolmaıdy» degen oılardan arylý kerek! Asyqpańyz jáne abaılańyz! Únemdelgen sekýndtar nemese mınýttar sizdiń ómirińizdi qııýǵa turarlyq dúnıe emes! Sizdiń ómirińizden mańyzdy eshteńe joq!» - dedi Aqtoty Boranova.
