Úsh kúnde mas kúıde kólik basqarǵan 30-ǵa jýyq elordalyq ustaldy - polıtsııa

ASTANA. QazAqparat – 31 mamyr men 2 maýsym aralyǵynda elorda aýmaǵynda «Mas júrgizýshi – qylmysker» jedel aldyn alý sharasy ótti, dep habarlaıdy QazAqparat tilshisi.

«Jedel profılaktıkalyq is-shara barysynda Astana qalasynda 28 júrgizýshi ustalyp, medıtsınalyq kýálandyrýdan ótý úshin olar narkologııa ortalyǵyna jetkizildi. Onyń ishinde 23 júrgizýshiniń mas ekeni rastaldy. Al úsh adam kýálandyrýdan ótýden bas tartyp, olarǵa hattama rásimdeldi. Jedel aldyn alý is-sharasyna Astana qalalyq Polıtsııa departamenti patrýldik polıtsııa bólimshesiniń 25 jáne 6 motovzvod ekıpajy jumyldyryldy», - dep málim etti qalalyq departamenttiń baspasóz qyzmetinen.

Budan basqa, kólik quralyn basqarýǵa quqyǵy joq 7 mototsıkl júrgizýshisi anyqtalyp, jol júrý erejesin saqtamaı, moped basqarǵan 2 azamat ustalǵan. Jalpy, osy aralyqta túrli zań talabyna qaıshy áreketteri úshin 40 kólik aıyp turaǵyna qoıyldy.