Úsh kúnde 10 myń buzýshylyq: Aqtóbedegi jańa kameralar jol erejesin buzǵandardy tirkedi
AQTÓBE. KAZINFORM – Aqtóbe qalasynda iske qosylǵan 66 kamera 3 kúnde 10 myńnan astam buzýshylyqty tirkedi. Júrgizýshilerdiń kóbi jyldamdyqty saqtamaǵan.
Aqtóbe qalasynda 16 tamyz kúni 66 jańa kamera iske qosyldy. Oblystyq PD Ákimshilik polıtsııa basqarmasynyń aǵa ınspektory Álem Kóptileýovtiń aıtýynsha, jol qozǵalysy erejesin buzý deregimen qatar izdeýde júrgen avtokólik ıeleri de anyqtalady.
— Aqtóbede iske qosylǵan kameralardyń jumysyn taldaý barysynda oblys ortalyǵynyń kóshelerinde eń kóp taralǵan buzýshylyq — jyldamdyq rejımin asyrý. Bul kameralar izdeýde júrgen, aıyppuly kóp, baǵdarda turǵan, jalǵan memlekettik tirkeý nómirlerin taqqan avtokólikterdi anyqtaıdy. Atalǵan kameralar Aqtóbe qalasynyń 66 jerinde ornalasqan. Sonymen birge qalada ornatylǵan barlyq kameralardaǵy jyldamdyqty ólsheý shegi QR Jol júrisi erejelerine sáıkes 60 km/saǵ ekenin habarlap otyrmyz, - dedi Álem Kóptileýov.
Aıta keteıik, Aqtóbe oblysy boıynsha jyl basynan beri 416 jol-kólik apaty boldy. Onda 94 adam kóz jumyp, 578-i jaraqat aldy.
