Úsh kúnde 10 altyn: Qazaqstan quramasy Azııa Para oıyndarynda tarıhı jetistikke jetti
ASTANA. KAZINFORM - Japonııada ótip jatqan V Azııa Para oıyndarynda Qazaqstan ulttyq quramasy tarıhı nátıjege qol jetkizdi, dep habarlaıdy QR Týrızm jáne sport mınıstrliginiń baspasóz qyzmeti.
Otandyq para sportshylar jarystyń alǵashqy úsh kúninde 10 altyn medal jeńip alyp, Azııa Para oıyndaryndaǵy burynǵy úzdik kórsetkishin jańartty. Qazirgi ýaqytta ulttyq quramanyń qorjynynda 32 medal bar. Onyń 10-y altyn, 10-y kúmis jáne 12-si qola.
El qorjynyna altyn júldelerdi para nysana kózdeýden Erkin Ǵabbasov, para paýerlıftıngten Davıd Degtıarev, para dzıýdodan Ibragım Nurmahanuly, Beksultan Qulmyrza, Aqtolqyn Seıilbekova, Zarına Raıfova, Shýkýrbekov Jýrqamyrza, para júzýden Dıas Kenjebek, para velosporttan Naıl Ermuhanbet pen Anastasııa Kalaýs saldy.
Buǵan deıin Qazaqstan quramasynyń eń joǵary nátıjesi 2023 jyly Qytaıdyń Hanchjoý qalasynda ótken IV Azııa Para oıyndarynda tirkelgen edi. Ol kezde otandyq sportshylar 8 altyn, 12 kúmis jáne 21 qola medal ıelenip, jalpy sany 41 júldege qol jetkizgen. Osylaısha, bıyl ulttyq qurama altyn medal sany boıynsha burynǵy rekordty jańartyp, el sportynyń tarıhynda jańa beleske kóterildi.
Búgingi jarys kúni áli aıaqtalmaǵanyn jáne alda birneshe jarys kúni bar ekenin eskersek, sportshylardyń júlde qorjynyn odan ári tolyqtyrýǵa múmkindigi mol.
-Bul jetistik elimizde para sporttyń qarqyndy damyp kele jatqanyn jáne sportshylarymyzdyń halyqaralyq arenadaǵy básekege qabilettiliginiń artqanyn kórsetedi. Tarıhı nátıje sportshylar men jattyqtyrýshylardyń qajyrly eńbeginiń, sondaı-aq para sportty damytýǵa baǵyttalǵan júıeli memlekettik qoldaýdyń jemisi,-delingen habarlamada.
Aıta keteıik, bıylǵy Azııa Para oıyndarynda Qazaqstan namysyn 150 sportshy qorǵap jatyr. Jarys 24 qazanǵa deıin jalǵasady.
Osyǵan deıin Zarına Raıfovanyń Azııa Para oıyndarynyń jeńimpazy atanǵany týraly jazdyq.
