Úsh kún kóz ilmeı toqyma toqyǵan jetisýlyq rekordtar kitabyna endi
TALDYQORǴAN.QazAqparat - Almaty oblysynyń turǵyny Nurlan Jartybekov 72 saǵat boıy úzilissiz toqyma toqyp, Qazaqstannyń rekordtar kitabyna ekinshi márte endi. 29 jastaǵy jigit úsh kúnniń ishinde 43 metrlik uzyn sharfy toqyp shyqty. Endi ol álemdik rekordtty jańartpaq nıette, dep habarlaıdy QazAqparat tilshisi.
«Brazılııalyq azamat 65 saǵat úzilissiz toqyma toqypty. Nurlan Jartybekov bul rekordtan asyp tústi. Sondyqtan biz barlyq materıaldardy jınap, álemdik deńgeıdegi rekordtar kitabyna joldaýǵa nıettenip otyrmyz. Nurlan úsh kún boıy uıqysyz, kóz ilmeı toqyma toqyǵanda onyń barlyq ýaqyty baqylaýda boldy. Barlyq sáti arnaıy beınebaqylaýǵa jazylyp otyrdy jáne Nurlannyń densaýlyǵyn medıtsına qyzmetkerleri baqylady. Bizdiń fotograf mamandar da janynda boldy», - dedi Almaty oblystyq jastar resýrstyq ortalyǵy dırektorynyń orynbasary Dına Ábilmajınova.
Nurlan Jartybekov bala kúninen toqymaǵa mashyqtanǵan, ónerli jigit bul jolǵy rekordyn 13 tamyz kúni keshki saǵat 17:00 de bastap, 16 tamyz kúni saǵat 19:00 de aıaqtady. «Jetisu style» oblystyq jastar festıvalinde Nurlannyń toqymasy márege jetip, Qazaqstannyń rektordtar kitabynyń arnaıy sertıfıkaty tabys etildi. Sondaı-aq Almaty oblysynyń ákimi Amandyq Batalov Alǵys hatymen marapattady.
Aıta keteıik, búgin Taldyqorǵannyń Qaratal ózeniniń jaǵalaýynda «Jetisu style» oblystyq jastar festıvali uıymdastyryldy. Oblys basshysy Amandyq Batalov qatysqan keshte 25 túrli shara uıymdastyryldy. Bir alańda 100-ge jýyq dombyrashy kúı shertse, bir alańda túrli kórmeler ótti. Almaty oblystyq jastar saıasaty máseleleri basqarmasy men jastar resýrstyq ortalyǵy uıymdastyrǵan sharada turǵyndarǵa tegin qarbyz taratylyp, arnaıy kontserttik baǵdarlama da shymyldyǵyn túrdi.
Taldyqorǵandyqtardyń qarasy qalyń bolǵan festvalde Raim & Artur da boldy. Olardyń «Samaıa vyshka» ánine otshashý shashylyp, halyqqa tamasha kóńil-kúı syılady.
