Úsh kún iz-tússiz joǵalǵan boıjetken tabyldy
TALDYQORǴAN. QazAqparat - Jambyl aýdanynda joǵalǵan 17 jastaǵy boıjetken aman esen tabyldy. Medıtsına kolledjiniń stýdenti úsh kún boıy qurbysynyń úıinde bolǵany anyqtaldy, dep habarlaıdy QazAqparat tilshisi.
Uzynaǵash aýylynda turatyn boıjetken óziniń jaqyndarymen renjisip, úıinen qashyp ketken. Jasóspirimdi izdeýge aýdandyq polıtsııa bóliminiń barlyq jeke quramy kirisip, bir táýlikten soń oblystyq Іzdeý bóliminiń jedel ýákilderi qosyldy. Іz-tússiz joǵalǵan tulǵa týraly tuspal óńirdiń barlyq polıtsııa bólimshelerine taratylady.
Qyz bala oblys ortalyǵynan tabyldy. Ol qurbysynyń úıinde qonaqta bolǵan. Qazirgi ýaqytta stýdent Taldyqorǵan qalalyq Kámeletke tolmaǵandardy beıimdeý ortalyǵyna jetkizildi. Mamandar jasóspirimniń týystarynyń qatysýymen profılaktıkalyq áńgime júrgizetin bolady.
