Úsh kún ishinde el polıtseıleri jalpy somasy 80 mıllıon teńgeni quraıtyn kontrafaktilik ónim tárkiledi
ASTANA. 12 maýsym. QazAqparat - Maýsymnyń 4-i men 6-sy aralyǵynda respýblıka aýmaǵynda erkin aınalymǵa tyıym salynǵan aqparattar men ónimderdi taratýǵa qatysty, sondaı-aq aqparattyq tehnologııalardy, onyń ishinde ınternet jelisin paıdalaný arqyly jasalatyn ózge de qylmystardy anyqtaýǵa, jolyn kesýge jáne ashýǵa baǵyttalǵan «Kontrafakt» jedel aldyn alý sharalary ótti. Bul týraly QR ІІM baspasóz qyzmetinen habarlady.
Operatsııa barysynda krımınaldyq polıtsııa bólinisteri 256 quqyq buzýshylyqty anyqtady. Zańsyz aınalymnan 28 myńǵa tarta kontrafaktilik ónimdi, sonyń ishinde pornografııalyq mazmundaǵy dıskter men kontrafaktilik uıaly telefondardy tárkilep aldy.
Erkin aınalymnan shyǵarylǵan ónimderdiń jalpy quny shamamen 80 mln. teńgeni quraıdy. Jedel aldyn alý sharalary kezinde aýdıo-beıne ónimder satylatyn oryndar, kompıýterlik klýbtar, ınternet-kafe, kompıýter tehnıkalaryn satatyn jáne jóndeıtin fırmalar tekserildi.
Tekseris barysynda kontrafaktilik ónimder daıyndaıtyn 5 jasyryn tseh (Almaty q., Aqtóbe oblysy jáne ShQO) anyqtalyp, kontrafaktilik ónimderdi respýblıka aýmaǵyna kirgizetin 2 arnanyń joly kesildi (Almaty oblysy ІІD).
Barlyq anyqtalǵan quqyq buzý faktileri boıynsha saraptama taǵaıyndaldy, saraptama nátıjeleri negizinde protsessýaldyq sheshimder qabyldanatyn bolady.
