Úsh kún buryn shuńqyrǵa túsip ketken aqtóbelik tabylmaı jatyr
AQTÓBE. QazAqparat - Aqtóbede uıaly telefon arqyly qońyraý shalyp, kómek suraǵan 54 jastaǵy er adam tabylmaı jatyr, dep habarlaıdy QazAqparat tilshisi.
Aqtóbelikter úsh kúnnen beri 54 jastaǵy Kenjebaı Aldashevti izdestirip jatyr. Ol 10 qarasha kúni saǵat 04:56-da tótenshe jaǵdaılar qyzmetine telefon shalyp, óziniń shuńqyrǵa qulap ketkenin, kúshi sarqylyp, shyǵa almaı jatqanan aıtqan. Sodan beri izdeý jumystary júrip jatyr, biraq nájıjesiz.
«Tótenshe jaǵdaılar departamenti qońyraý shalǵan jerdi anyqtaý úshin «KarTel» JShS-na suranys jiberip, aqparat aldy. Joǵalǵan turǵynnyń Aqtóbe qalasy, Aqjar aýyly mańynan habarlasqany anyqtaldy. Іzdeý jumystaryna tótenshe jaǵdaılar departamentinen 4 adam, 2 tehnıka, 2 kınolog jáne kvadrokopter jumyldyryldy. Іzdeý jumystaryna eriktiler de shyqty. Biraq ázirge ol adam tabylmady», - dep habarlady oblystyq tótenshe jaǵdaılar qyzmetiniń baspasóz qyzmeti.
Al 11 qarasha kúni 54 jastaǵy K.Aldashevtiń baılanys telefony qaıta qaralyp, endi Aqshat aýyly mańynda júrgeni belgili boldy. Sol kezde eki top izdeýge shyqty. Birinshi topta 6 qutqarýshy, 1 tehnıka jáne 1 kvadrakopter bolsa, ekinshi topqa 7 qutqarýshy, 2 kınolog, 1 tehnıka berildi. Biri Aqshat, ekinshisi Aqjar aýyly mańynda izdeý jumystaryn júrgizdi. Qutqarýshylar men eriktiler qarańǵy túskenshe izdeýdi jalǵastyrdy, biraq joǵalǵan adam tabylmady.
Aıta keteıik, búgin izdeý-qutqarý jumystary jalǵasyp jatyr. Qazir tótenshe jaǵdaılar qyzmetinen 10 adam, 2 kınolog, kvadrokoptermen arnaıy tehnıka aýyl mańyn tintýge kóshti.
