Úsh kún buryn Almaty taýlarynda joǵalyp ketken jigit tabyldy
ALMATY. QazAqparat - Almaty taýlarynda úsh kún buryn joǵalǵan er adam tabyldy, dep habarlaıdy QazAqparat tilshisi.
Qutqarý operatsııasy týraly TJK baspasóz qyzmeti jarııalady.
«Ákeli-balaly ekeýi 27 maýsymda taýǵa shyǵyp ketken. Týrıst asýyna jetken soń ákesi sharshap, ári qaraı barmaǵan. Balasy rıýkzaktaryn sol jerge qaldyryp, taýǵa kóterilgen. Balasynyń shyńǵa jetkenine kóz jetkizgen ákesi Úlken Almaty kóliniń jaǵalaýyna qaraı túsken. Al balasy shyńnan túsip kele jatyp, jolda uıyqtap kalǵan. Oıanǵan soń asýda rıýkzagyn qaldyryp ketkeni esine túsken. Osylaısha qaıtadan artqa oralǵan. Kóldiń boıynda kútken ákesi alańdap, qutqarýshylarǵa habarlasqan»,- dedi baspasóz qyzmetinen.
8 qutqarýshy izdestirý jumystaryna kiristi. Olar eki topqa bólinip, bir top - Úlken Almaty kóli, ekinshisi - Týrıst asýy jaǵynan izdeýdi bastap ketti.
«Arada biraz ýaqyt ótkende joǵalǵan jigit Keńester shyńynan túsetin joldan tabyldy. Bir tún jyly kıimsiz taýda qonǵanyna qaramastan, onyń deni saý, medıtsınalyq kómekti kerek qylǵan joq», - dep málim etti TJK baspasóz qyzmeti.
Áke men bala qaýyshqan soń qutqarýshylar olarǵa taýda júrip-turý erejelerin túsindirdi.
