Nıkıta Boıarkın «Barystan» ketýiniń sebebin ashyp aıtty
ASTANA. KAZINFORM — Qazaqstan quramasy men Vladıvostoktyń «Admıral» klýbynyń qaqpashysy Nıkıta Boıarkın maýsymaralyq kezeńde «Barys» komandasynan kútpegen jerden ketýine qatysty egjeı-tegjeıli suhbat berdi. Sondaı-aq ulttyq quramanyń taǵy bir qaqpashysy Andreı Shýtovpen aradaǵy janjal týraly qaýesetterge túsinikteme berip, Qıyr Shyǵysqa qonys aýdarý týraly sheshiminiń sebebin túsindirdi. Bul týraly Kazinform agenttiginiń tilshisi jazdy.
Ótken maýsymda qaqpashy aýyr jaraqat alyp, tizesiniń aldyńǵy aıqas baılamy úzilip, toǵyz aı boıy oıyndarǵa qatysa almady. Boıarkın jańa chempıonatty Astanada bastaýdy josparlaǵanymen, klýb basshylyǵy onymen jasalǵan kelisimshartty birjaqty tártippen buzǵan.
«Toǵyz aı boıy oıyndarǵa qatyspadym. Emdeldim, ońaltý kýrsynan óttim, jattyǵýǵa daıyndaldym. Tipti alańǵa josparlanǵan merzimnen sál erterek oraldym. Ol kezde qaqpashylar jetispedi, sheteldik oıynshy jaraqat alyp qaldy. Sondyqtan oıynǵa shyǵýyma týra keldi.
Árıne, alańǵa oralǵanda qobaljý boldy. Óıtkeni jaraqatym óte aýyr edi. Tipti sporttyq mansabymdy jalǵastyra alamyn ba degen suraq ta týyndady. Qaqpashylar arasynda mundaı jaraqattar sırek kezdesedi. Degenmen belgilengen merzimde qalpyma keldim. Maýsym barysynda ár oıyn saıyn babymdy jaqsarta tústim.
Maýsymaralyq kezeńde kelisimshartymnyń quny joǵary ekenin jáne klýbtyń menen qoıatyn talaby da soǵan saı bolatynyn túsindim. Alaıda osy maýsymda ózimniń daıyn ekenimdi dáleldeýge de múmkindik bermegeni kóńilime azdap qaıaý túsirdi. Biraq klýb osyndaı sheshim qabyldady, oǵan yqpal ete almadym», — dedi Nıkıta Boıarkın QHL-dyń resmı saıtyna bergen suhbatynda.
Nıkıtanyń aıtýynsha, jaraqattan keıin ózin kórsetýge oǵan múmkindik berilmegen.
— «Barystan» eshqandaı usynys bolǵan joq. Bar bolǵany úsh kún buryn telefon soǵyp, jattyǵýǵa kelmeýimdi aıtty. Odan keıin jańa komanda izdeýge shamamen eki apta ýaqyt ketti. Bir apta ishinde «Admıral» klýbynan habarlasyp, meniń kandıdatýrama qyzyǵýshylyq tanytatynyn jetkizdi. Úsh kúnniń ishinde barlyq máseleni talqylap, kelisimshartqa qol qoıdym, — dep túsindirdi qaqpashy.
Sondaı-aq Boıarkın jańa komandasynda óziniń myqty oıynshy ekenin dáleldeýge nıetti ekenin, alaıda burynǵy klýbynan kek alýdy maqsat etpeıtinin aıtty.
Andreı Shýtovpen aradaǵy jasandy básekelestik týraly qaýesetterge de ázilmen jaýap berdi.
— Aramyzda eshqandaı óshpendilik bolǵan joq. Bir-birimizdiń konkıimizdiń júzin qaırap, zııan keltirýge tyrysqan emespiz (kúledi). Ol óz jumysyn atqardy, men óz jumysymdy istedim, — dep atap ótti Boıarkın.
Jaqynda Nıkıta «Barystan» ketkennen keıin alǵash ret Astanada burynǵy komandasyna qarsy qonaq qaqpashysy retinde muz aıdynyna shyqty.
— Jankúıerler meni jyly qarsy aldy, oıyn boıy qoldaý kórsetti. Óz úıimde oınaǵandaı áser aldym desem de bolady. Bul óte jaǵymdy boldy, — dep túıindedi qaqpashy.
Eske sala keteıik, buǵan deıin Qazaqstandyq «Barys» Qurlyqtyq hokkeı lıgasyndaǵy kezekti oıynyn 15 qarashada elordada Reseıdiń «Metallýrg» (Magnıtogorsk) komandasyna qarsy ótkizgen bolatyn.