Úsh kelige 3 mln teńge: ShQO-da esirtkini óz erkimen tapsyrǵandar syıaqy aldy
ÓSKEMEN. KAZINFORM — Óskemen qalasynyń turǵyny bir keliden astam sıntetıkalyq esirtkini óz erkimen tapsyrǵany úshin qomaqty aqshalaı syıaqy aldy. Bul týraly ShQO prokýratýrasynyń baspasóz qyzmeti habarlady.
Tólem oblys prokýratýrasynyń bastamasymen qolǵa alynǵan, esirtki qylmysyna qarsy kúreste azamattardy belsendilik tanytýǵa yntalandyrýǵa baǵyttalǵan «STOP esirtki!» pılottyq jobasy aıasynda júzege asyryldy.
Joba iske qosylǵannan beri bir jyl ishinde óziniń tıimdiligin kórsetti. Túsken habarlamalar boıynsha 12 qylmystyq is tirkelip, zańsyz aınalymnan 3 kelige jýyq sıntetıkalyq zat tárkilendi. Qyraǵy azamattarǵa berilgen tólemderdiń jalpy somasy 3 mln teńgeden asty.
— Oblys prokýratýrasy turǵyndardy esirtki taratý faktileri týraly «102» arnasyna nemese 14 68, 8 771 659 53 22 senim telefonyna habarlaýǵa shaqyrady. Árbir habarlasqan adamǵa qupııalylyqqa, qaýipsizdikke jáne rastalǵan aqparat úshin aqshalaı syıaqyǵa kepildik beriledi, — delingen habarlamada.
Aıta keteıik, Taraz polıtsııasy 43 jastaǵy kúdiktiden 122 gramm sıntetıkalyq esirtki tárkiledi.
