Úsh qazaqstandyq ústel tennısinen álem chempıonatyna qatysady

ASTANA. KAZINFORM — 17-25 mamyr aralyǵynda Qatarda ústel tennısinen álem chempıonaty ótedi.

Ulttyq olımpıada komıtetiniń málimetinshe, Álem birinshiliginde medaldar jekeleı synda, erler men áıelder juptyq jarysynda, sondaı-aq aralas juptar saıysynda sarapqa salynady.

Jekeleı jarysta 128 tennısshi (onyń ishinde 32 iriktelgen oıynshy) baq synaıdy, al juptyq saıystarǵa 64 jup (16 iriktelgen jup) qatysady.

Qatarda Qazaqstan namysyn Kırıll Gerasımenko (jekeleı syn), Sarvınoz Mırkadırova men Zaýresh Akasheva (juptyq syn) qorǵaıdy.

Aıta ketý kerek, irikteýden ótken keıbir sportshy álem chempıonatyna qatysýdan bas tartsa, Qazaqstannyń qosymsha oıynshylary da bul jarysqa qatysýy múmkin.

Buǵan deıin Fýtboldan Qazaqstan quramasy búgin Soltústik Koreıamen kezdesetinin jazǵan edik.