Úsh qalaǵa sý, jylý jáne jaryq beretin Qanysh Sátbaev kanaly apatty jaǵdaıda tur

PAVLODAR. QazAqparat - Májilis depýtaty, JSDP fraktsııasynyń múshesi Ajar Saǵandyqova Pavlodar oblysyna jumys sapary barysynda Qanysh Sátbaev atyndaǵy kanaldyń №4 sý elektr kesheniniń №87 bógetine bardy. Strategııalyq nysan apatty jaǵdaıda tur, biraq josyqsyz merdigermen sottasyp jatqandyqtan servıstik kompanııa tender ótkize almaıdy, dep habarlaıdy QazAqparat Májilistiń baspasóz qyzmetine silteme jasap.

Kanaldyń Pavlodardaǵy basqarma basshysy Vladımır Egerdiń aıtýynsha, kanaldyń naqty paıdalaný merzimi - 60 jyl bolsa, standartty merzimi - 25 jyl.

Tehnıkalyq qoldaý kórsetilse de arnanyń sýmen qamtamasyz etý deńgeıi tómen. Bul qysqy maýsymda apatqa ushyraý qaýpin týdyrady.

– Qazir kanal jumys isteýi kerek qalypty ustap turý gorızonty deńgeıine jetý úshin shamamen bes mıllıon tekshe metr sý jetispeıdi. Al búkil kanal boıynsha 70 mıllıon tekshe metrden astam sý tapshylyǵy baıqalady. Qys mezgiline mundaı tómen sý deńgeıimen kirý qaýipti, óıtkeni mundaı kórsetkishpen biz sorǵy stantsııalary men basseınderin qamtamasyz ete almaımyz. Jańa tender de jarııalaı almaımyz, óıtkeni sot protsesi júrip jatyr, — dedi Vladımır Eger.

Kanaldyń gıdrotehnıgi Svetlana Jarkova 22 sorǵy stansasy ornalasqan nysandardyń tóbesine qatysty alańdaýshylyq bildirdi.

Ylǵal túsken jaǵdaıda elektr jabdyqtary isten shyǵýy múmkin, sondyqtan shuǵyl jóndeýdi qajet etedi.

Kanaldyń Pavlodar bóliminiń basshysy 1996 jyldyń jeltoqsanynda elektr qosalqy stantsııasy isten shyǵyp, búkil Ekibastuzdy jylý elektr stantsııasy jumys isteı bastaǵannan beri jaryqsyz, jylýsyz jáne sýsyz qaldyrǵan jaǵdaıdyń qaıtalaný qaýpi baryn aıtady.

Depýtat Ajar Saǵandyqovanyń aıtýynsha, másele arnanyń buryn derbes zańdy tulǵa bolǵanynda. Odan keıin Kazvodhozǵa aýystyrylǵan.

– Ońtústiktegi ırrıgatsııalyq júıelerdi jóndeý kerek boldy, al kanal, bir ǵajaby, halyqaralyq bankterden nesıe alýǵa kepildik boldy. Buryn ózin tolyq aqtap kelgenimen, kezekti jáne kúrdeli jóndeý jumysyn júrgizýge olardyń jeke kadrlary, óz qarajaty boldy. Biz, depýtattar, bul arna ózin-ózi qamtamasyz etetindikten ári el úshin strategııalyq mańyzy zor bolǵandyqtan, ony kepilden alyp, jeke-dara derbes zańdy tulǵa etý kerek degen máseleni kóterdik. Munda qarjy salý kerek, óıtkeni 22 sorǵy stansasy jumys isteıdi, olardyń árqaısysy qaıta qaraýdy jáne kúndelikti jóndeýdi qajet etedi, - dedi Ajar Saǵandyqova.

2018 jyly «Qazvodhoz» RMK jarǵylyq kapıtalyn ulǵaıtý» baǵdarlamasy aıasynda 241 apatty sý qoımasy men gıdrotehnıkalyq qurylysty qalpyna keltirýge, onyń ishinde osy bógetti jóndeýge respýblıkalyq bıýdjetten qarajat bólindi.

Shartty oryndaý barysynda onyń merzimi birneshe ret uzartyldy.

«Qazvodhoz» RMK Pavlodar oblysynyń mamandandyrylǵan aýdanaralyq ekonomıkalyq sotyna merdigerdi memlekettik satyp alýdyń josyqsyz qatysýshysy ekeni týraly talap aryzben júgindi.

Merdiger qarsy talap qoıyp, protsess uzaqqa sozylyp ketti.

Qazirgi ýaqytta azamattyq is qaralyp jatyr. Іs boıynsha qurylys-ekonomıkalyq qaıtalama sot saraptamasy taǵaıyndaldy.

Azamattyq is boıynsha túpkilikti sheshim qabyldanǵan joq.

Májilistiń ekologııa jáne tabıǵatty paıdalaný komıtetiniń múshesi Ajar Saǵandyqova bul máseleniń jeke baqylaýynda ekenin aıtty.