Úsh qalada salynatyn JEO-lar qurylysyn qarjylandyrý máselesi qashan sheshiledi

ASTANA. KAZINFORM — Kókshetaý, Semeı jáne Óskemen qalalarynda salynatyn JEO-lar boıynsha Peterbor ekonomıkalyq forýmynda talqylaý bolady. Bul týraly Energetıka mınıstri Erlan Aqkenjenov aıtty.

Búgin Parlament Májilisiniń jalpy otyrysynyń aldynda tilshiler mınıstrden «elimizdegi úsh jylý elektr ortalyǵynyń qurylysyn reseılik tarap qarjylandyrýdan bas tartty ma? dep surady.

— Mende ondaı aqparat joq. Bul suraqqa naqty jaýap berý úshin jaqynda Peterbor halyqaralyq ekonomıkalyq forýmy alańynda (bıylǵy 18-25 maýsym aralyǵynda) tıisti kezdesý ótýi kerek dep oılaımyn, — dedi E. Aqkenjenov.

Onyń aıtýynsha, qazir úsh JEO-ny salýǵa bıýdjetten qansha qarajat jumsalatyny qurylys kezinde ornatylatyn jabdyqtarǵa baılanysty aıqyndalady.

— Eger reseılik jabdyq bolsa, onda tıisti baǵa eseptelgen. Al eger qytaılyq jabdyqtar paıdalanylsa, sáıkesinshe basqa baǵa shyǵýy múmkin. Qazirgi kezde reseılik jáne basqa da merdigerler tarapynan naqty usynys bolmady, — dedi mınıstr.

Eske salsaq, byltyr sáýirde Qazaqstan Respýblıkasy men Reseı Federatsııasynyń energetıka mınıstrlikteri arasynda Kókshetaý, Semeı jáne Óskemen qalalarynda JEO salý jobalary boıynsha yntymaqtastyq týraly kelisimge qol qoıyldy. 

Keıin elimizdiń úsh qalasynda salynatyn jylý elektr ortalyqtary «Samuryq-Energo» kompanııasynyń teńgeriminde bolatyny belgili boldy. 

Energetıka mınıstrliginiń aqparaty boıynsha Kókshetaýdaǵy jylý ortalyǵy 2029 jyly, Óskemendegi ortalyq 2031 jyly, al Semeıdegi ortalyq 2032 jyly tolyq paıdalanýǵa beriledi.